CBI -in Mizo Carbon a chhui dawn ; High Court-in thupek a tichhuak

Gauhati High Court, Aizawl Bench chuan Industrial Growth Centre, Luangmuala Mizo Carbon Product-in sorkar laipui aṭanga sum a hmuh danah thil dik lo awm nia sawi ṭhin chu Central Bureau of Investigation (CBI) chhui turin thutlukna a siam. Sorkar ukil chuan he thubuai hi political case a nih vangin CBI koh luh mai hi a lo rawt tawh bawk a ni.

Mizo Carbon-in raw material phurh luhna tur Central Transport Subsidy cheng nuai 247 leh Central Capital Investment Sub­sidies (CCIS) atan cheng nuai 93.90 a hmuh danah thil dik lo a awm nia hriat vangin Vanramchhuangi, Human Rights & Law Network chuan May 15, 2017 khan High Court-ah PIL a thehlut a; Mizo Carbon chu CBI chhuitir turin High Court a ngen.

Vanramchhuangi ukil pahnih, C Lalramzauva leh TJ Lalnuntluanga te sawi danin, Vanram­chhuangi petition chungchangah hian High Court chuan October 31, 2017 khan thutlukna a siam a; nimin khan Mizo Carbon Product chungchang chu CBI chhuitir turin order a siam a ni.

Thu dawn danin, Vanramchhuangi ukilte chuan Mizo Carbon Product chungchang chhuitu ACB chu Mizoram sorkar thuhnuaia awm a nih avanga an ring tâwk lo a, Court hnenah CBI koh chhuah an dil a ni.

October 31-a he thubuai ngaihtuahnaah hian Mizoram sorkar ukil chuan, thubuai hi political case a ni a, opposition lam pawhin CBI chhuitir tura Chief Minister an lo ngen tawh avangin, CBI chhuitir mai a pawi loh thu Court-ah a thlen a ni.

Judge chuan sorkar ukil thusawi chu an pawm leh pawm loh Vanram­chhuangi ukilte a zawt a, an pawm avangin CBI chhuitir turin thutlukna a siam ta a ni.

CBI-in a chhui hun tur atan hian hun bituk a awm lo a, a rang thei ang bera chhui tura tih a ni. Court thupek a nih chuan CBI lam hian hna an ṭan vat zel nia thu dawn a ni bawk.

Vanramchhuangi ukilte chuan, sorkar ukil thusawi an pawm chhan Vanglaini hrilhin, "Kan duh ber chu CBI koh luh a nih avangin, CBI koh luh rawtna kan pawm. Hetiang hian dil lo ila chuan sorkar lam hian CBI chhuitir an tum kan ring lo," an ti.

Zawhna chhangin Vanramchhuangi ukilte chuan Chief Minister leh minister pathumte he thubuaia chhui tel tur ngenna chu ngaihtuah tura an dil nawn tawh loh thu an sawi.

He thubuaiah hian chief minister Lal Thanhawla bakah minister pathum - Lalsawta, H Rohluna leh Zodintluangate chu an inhnamhnawih leh hnawih loh chhui turin Vanramchhuangi ukilte chuan Court an ngen a, mahse Court chuan a pawm lo.

Hetih lai hian, he thubuai chhui mektu ACB lam chuan chargesheet an la peih lo a, an chhui zui zel a ni.

High Court order chungchangah hian MNF party chuan thuchhuah siamin, CBI chhuitir ngei ni se an duh avanga vawi nga lai Chief Minister-ah lehkha a lo thehlut tawhna Mizo Carbon chungchang chhui tura CBI a ti chu lawmawm an tih thu an tarlang a; an ngenna pakhat, Mizoram state loterry chungchanga sum chingpen nia an hriat chungchang pawh CBI chhuitir a nih theih nan an nawr zui zel tur thu an sawi bawk.

Tarlan tawh ṭhin angin, RTI Act hmanga Vanglaini zawhna Industries department-in an chhan dan chuan, January 1, 2013

aṭanga September 30, 2014 inkar khan Mizo Carbon Product hian CCIS atan cheng nuai 93.90 leh raw material phurh ṭanpuina CTS atan cheng vbc. 2.47 dilna District Industries Centre, Aizawlah an thehlut a; an dilna chu SLC-in ngaihtuahin, an dil zat ang chu sorkar laipuiah an dilpui a ni.

RTI Act chhannaa a lan danin, Mizo Carbon Product hi Ravi Gulgulia leh Dr Mar­garet Makimi Varte te ta a ni a; breeze coke, hard coke leh LAM coke an siam ṭhin. Coke hi February 14, 2012-ah an siam ṭan a, raw material metric ton 9,046 la lut tawhin, an thil siam chhuah tawh zat chu metric ton 5492.20 a ni. An thil siam chhuahte chu Mizoram chhung leh hmarchhak state dangahte hralh a ni ṭhin niin an tarlang.