MPSC-in MJS result a tichhuak

Mizoram Public Service Commission (MPSC)-in Mizoram Judicial Service (MJS) tur lakna a kalpuiah nimin khan final result a tichhuak a, mi 16 tlingin, Cacy Malsawmtluangi Ralte, Kanan Veng, Aizawl chu pakhatna a ni.

MJS Grade-III lakna turah hian MPSC chuan July 14-15, 2017 main exa­minations an buatsaih a, main exam-a tlingte chu October 12-13 khan personal interview neih­pui an ni.

MPSC danah chuan post 10 aia tamah chuan personal interview turin post awm zat lêt koh tura tih a ni. Tun ṭuma MJS lak turah hian post 16 a awm a, interview turin 32 aia tlem lo koh theih ni mah se, mi 27 koh an ni. Mi 27 chiah koh an nih chhan chu, MJS rules-ah personal interview tura mark hmuh tlin ngai zat (minimum mark) a awm a, mark hmuh tlin ngai zat hmu tling mi 27 chiah an awm vang a nih thu MPSC hotute chuan an sawi.

Thu dawn danin, MPSC danah, sorkar hna thawk tura exam leh personal interview-te kalpui dan turah, personal interview zawh ní-ah result tichhuah nghal ngei tura tih a ni a, mahse, MJS bik hi chu October 13-ah interview tih zawh a nih tawh laiin, November 1-ah result tihchhuah a ni. Hemi chungchanga Vanglaini palai zawhna chhangin MPSC secretary Lalzirmawia Chhangte chuan, MJS rules bik a danglam a, an rules angin result tihchhuah ní tur ruahman lâwk (November 1, 2017) a awm vang a nih thu a sawi.