8th Schedule-a Mizo tawng a tel theih nan Theihtawp chhuahin kan nawr zel dawn - CM
Chief minister Lal Thanhawla chuan, 8th Schedule-ah Mizo ṭawng telh a nih theihna atan Mizoram sorkarin theihtawp chhuahin a nawr zel tur thu a sawi.
Mizoram University-a Department of Mizo leh National Mission For Manuscripts, IGNA, New Delhi ten nimina Synod Conference Centre-a ni thum awh tur, 'Writing in Mizo Manuscripts' tih thupui hmanga national seminar an buatsaih hawnna inkhawmah thu sawiin Chief Minister chuan, "8th. Schedule-a Mizo ṭawng telh turin hman ata tawh tun thlengin sorkarin hma a la mek a, theihtawp chhuaha nawr zel a tum. National language zinga Mizo ṭawng telh hi thil tihmâkmawh, hamṭhatna tam tak thlentu tur a ni," a ti.
Lal Thanhawla chuan, Mizo ṭawnga ziak taima tak tak, thu dik lo ziah chíng an awm ṭhin chu pawi a tih thu sawiin, "Ṭhangtharte'n Mizo history dik tak an hriat theih nan thu dik din chhuahpuia thu ziak mite an pên chhuah a ṭul. Duhlian ṭawng dik taka vawnhim zel a nih theihna tur leh ṭhangtharte'n Duhlian tawng, Mizo ṭawng tia hriat bawk, an tihchhiat mekte siamṭhat a nih theih nan remchang a piangah ka sawi ve ṭhin," a ti a; Mizo ṭawng vawnhim zel dan tur a vei thu a sawi.
Chief Minister chuan, Zo fate chu Kumpinu policy, 'Awpbet la, ṭhendarh rawh' tih hmalakna tuar berte zinga mi ni mah se, vanneihna tak an nei tih a sawi a, "Kan vanneihna chu Duhlian ṭawng hmanga inbe thei deuh vek kan ni a, Myanmar, Bangladesh leh India hmarchhak state pathum - Assam, Manipur leh Tripura-a Zo fate zawng zawng hian Duhlian ṭawng hi kan hrethiam deuh vek tih a hriat a, min phuarkhawmtu a ni. Hei hi ṭangkai taka hman a nih theih nan thu ziak mite an pawimawh hle," a ti.
Writing in Mizo Manuscripts seminar neih chhung hian thupui hrang hrang siamin, zirhona hun leh mithiamte inbuatsaihna ngaihthlakna hunte hman a ni dawn a; a duh apiangte tan chhim theih niin, Zosap te, bawrhsap hmasa te, official hmasate leh hranghluite kutchhuak leh an kutziakte pho chhuah a nih bakah, lehkhabu lei tur a awm bawk.