Digital lama hmasawnna tur sawiho

Digital lama hmasawnna tur programme viltu tur Champhai District Level Committee on PMGDISHA chu nimin khan an chairman Vanlalngaihsaka, district bawrhsap hoin DC conference hall-ah an ṭhukhawm a, hmalak dan tur an sawiho.

Khawvela Digital Literacy Programme lian ber ni tura ruahman PMGDISHA hi Digital India Programme, Ministry of Electronics & Information Technology hnuaia din a ni a, February 2017 khan Union Cabinet-in a pawm. Project atan hian sum cheng vbc. 2,351.38 dah a ni a; project-in a tum chu - India ram puma thingtlang hmun kilkhawra awmte tana ni tin nun a zângkhai zawk theih nana internet, computer leh smart phone-te hmang thiam tura zirtir a ni.

District chhung hmun hrang hrangah training centre dina zirtirna pek tur a ni a, zir man a awm lo. Zir thei turte chu thingtlang (rural area)-a cheng kum 14-60 inkar, internet, computer leh smartphone kaihhnawiha thiamna la nei lo, chhungkaw pakhat aṭangin mi pakhat zel tan a ni.

Meeting-a tarlan danin, tun dinhmun­ah Champhai district-ah PMGDISHA kalpuina tur hian training centre pali - Farkawn, North Khawbung, Kawlkulh leh Dulte-ahte din a ni tawh a, zirlai inziak lut zawng zawng chu mi 661 a ni. Course zo tawh mi 661 an awm a, chu'ng zinga mi 204 chuan certificate an dawng tawh.

Champhai district-ah hian March 31, 2019 ral hma ngeiin mi 4,500 hnena digital khawl hmang thiam thei tura zirtirna pek hman tuma ruahmanna siam a ni.