Governor-in damdawi-in leh home a tlawh

Governor Lt.Gen. Nirbhay Sharma chuan nimin khan Aizawla home leh damdawi-in ṭhenkhatte a tlawh.

Larsapin a tlawhte hi Gilead Special School, Synod Hospital, TNT home, Kendriya Vidyalaya School, Pushpak Gurudwara leh Mizoram State Cancer Institute-te a ni.

Governor chuan Gilead Special School tlawh hmasa berin, Spastic Society of Mizoram chairperson Zokhumi Vankung hoin thawktute'n an lo dawngsawng a, zirlai naupangte'n lâm hrang hrang an lo entir. Larsap chuan, sikula zirlai naupangte chu pianphunga rualbanlo anga inngai lo a, theihna danglam bik an nei tih hre reng turin a chah a, an zirtirtute thawhrimna avangin hma lam hun êng tak an neih thu a sawi. Governor hian infiamna bungrua eng emaw zat a pe a ni.

Synod Hospital a tlawhnaah director Dr LH Thanga Singson leh thawktu dangte nen an inkâwm a; Nirbhay Sharma chuan, Synod Hospital-in pawl hrang hrangte nena a thawhhona leh mipui tana an rawngbawlna chu ropui a tih thu sawiin, Aizawla damdawi-in leh thawktu mithiamte chu a khát tawka inrâwnkhawmna nei a, an thiamnate inhrilh tawn tura a duh thu a sawi. Cancer, HIV leh ruihhlo vanga harsatna tam lutuk chu a vei thu leh, a dona kawngah kohhran leh damdawi-inte'n awmze neia hma an lak theih a rin thu a sawi bawk.

Governor hian Muanna Venga TNT hmun tlawhin, an hmunhmate a fang kual a; TNT dintu leh thawktute inpekna ropui a tih thu sawiin Larsap chuan, TNT home tan tih theih a nei a nih phawt chuan ṭanpui a inhuam thu a sawi a, thilpek a hlan nghal.

Kendriya Vidyalaya School a tlawhnaah Governor hi Project Pushpak chief engineer Brig. Birender Singh leh principal Mukesh Kumar ten an lo dawngsawng a ni.

Mizoram State Cancer Institute (MSCI) a tlawhnaah director Dr Zoramthanga leh Medical Oncology department head Dr Jerry L Pautu ten an hmunhmá an fanpui a; Larsap chuan, cheng vbc. 45 sênna tur Tertiary Care Cancer Centre sak mek chu hun leh sum ruahman lâwk ang taka zo tura a duh thu a sawi.