Khawpui fai inelna tur inhrilhfiah

UDPA department chuan nimin khan NLUP conference hall-ah India ram puma khawpui fai inelna, 'Swachh Survekshan 2018' atana hmalak dan turte inhrilhriatna hun, 'Sensitization workshop on Swachh Survekshan 2018' an buatsaih a, UDPA minister Zodintluanga'n a hmanpui.

Minister Zodintluang­a chuan, khua a ṭhang lian a, mipui an pung zel a, khawpui mamawh sang zel karah khaw­puia chengte'n nunphung pangngai an neih theih nan UDPA department-in a theihna apiangah mipui tan hma a lak ṭhin thu a sawi a, "A cháng chuan mi harsa zawkte tana in sak hnate kalpui a ni a, thiamthil chherchhuah nan skill development te, hmasawnna ruhrel dinna kawngahte leh khawpui chhunga tualchhung sorkar inrelbawlna kawngah pawh nasa takin hma a la a ni," a ti.

Swachh Survekshan 2018-ah hian khawpuii 4,041-te an inel dawn tih sawiin Zodintluanga chuan, "Hei thil hi India ramah Mizoram hi state fai berte zinga mi a nihzia pholanna remchang a ni a, hemi atan hian UDPA department pawhin theih­tawpa hmalak a ṭul a ni tih hriain district administration lama hotute nena hna thawh dan tur sawihona hun buatsaih a ni," a ti a; Swachh Survekshan 2018 atan hian mawhphurhna an nei ṭheuh a ni tih hria a, pheikhai rual taka ke pên turin thawktute a sáwm.

Workshop hi UDPA director Joseph H Lal­ram­sanga'n a kaihruai a; UDPA secretary Dr C Vanlalramsanga'n Swachh Survekshan 2018 sawi­fiahin, "State level-a khawpui fai ber ni mai duh tâwk mai lo a, national level leh khawvel huap pawha lang pha tura hmalak a pawimawh," a ti.

Workshop-ah hian Swachh Survekshan 2018 atana hmalak dan tur hrang hrang sawiho a ni a; Aizawl Municipal Corporation huam chhung­a khawlaia bawlhhlawh paihte chunga hmalak dan tur ruahmanna siamte tarlan a ni bawk.