Hri danna atana hmalak dan tur hrilhfiah

Ministry of Health & Family Welfare-in hri danna pek beihpui thlaknaa Mizoram sorkar pui tura a rawn tirh doctor palite chuan October 31, Thawhlehni khan Health minister Lal Thanzara an kâwm a; January 2018-a Mizorama Measles-Rubella Campaign neih tura Health department-a hri danna kaihhnawiha thawkte zirtirna an pek dan tur leh ruahmanna an kalpui dan tur an hrilhfiah.

Health Minister chuan, doctor palite chu campaign hlawhtling tak nei a, a mamawh zawng zawngte huap a nih vek theih nan Health department chu theih­tawp chhuahpui turin a sáwm a; sorkar laipui programme-in measles-rubella hri danna a ­thláwna ruahman a ni ta chu lawm­awm a tih thu sawiin, hmun kilkhâwr leh district hnufûm bikte ngai pawimawh turin a chah.

Doctor palite hian district chan an neih ṭheuh dawn a, thla thum aia tlem lo awm chilhin, hri danna leh tlang hriléng punlun tur enthlithlainaah an awmna district-te an pui dawn a ni.