Aizawlah Ola cab service a awm ta

Taxi koh theih, rate hran bik nei leh a tlan thui zawng meter-a teha chuan man pek theihna Ola Cab chu Aizawlah hman theih a ni ve ta a, motor 10-in bul ṭan a ni.

Aizawl khawpuia Ola cab service lak luh tur hi Traffic Jam Free Aizawl kalpui zelna hnuaia UDPA hmalakna a ni a; motor lei belh emaw, lak luh belh emaw ngai loa motor awm sa hmanga kalpui tum a ni.

Aizawlah Ola Cab a service ve theih nan hian a kaihhnawih sorkar department ṭhenkhatin hma an la a, May 30, 2017 khan UDPA secretary Dr C Vanlalramsanga hoin a pisaah Traffic SP, UDPA official, Transport department hotute leh Aizawl Municipal Cor­poration (AMC) hotute an lo ṭhukhawm tawh a ni. Ola Cab service lak luh a nih theih nan hian sorkar hotute leh Ola Cab hotute chu an lo indàwr tawh ṭhin.

Ola territory manager Dibjyoti Hanse leh a hote chuan Aizawla Ola cab service kalpui an tum dan te, mipui tana a ṭangkai­na turte leh awlsam taka mobile phone app hmanga koh theih a nih dante an sawifiah tawh a ni.

Ola cab service hian mobile phone app an nei a, chu chu phone-ah dah (install) a ngai a; Ola Cab app hmang chuan koh theih an ni.

India ram khawpui lian zawkah chuan Ola cab service hi a awm deuh vek tawh a; taxi pangngai aiin a tlâwm zawk hle niin a hmang tawhte chuan an sawi.