Eptu MLA-te'n LRS deptt. in an enfiah

MNF MLA pahnih - Lalrinawma leh Dr K Beichhua te chuan nimin khan New Secretariat Complex-a Land revenue & Settlement (LRS) department building, Aizawl district Settlement Officer pisa chu a hmunah an enfiah.

In hi sak thar, kumina hawn chauh ni mah se, a satute'n an sak chhiat avangin chhe neuh neuh a awm nual tawh tih an sawi.

MNF ṭhalai president ni bawk Lalrinawma, MLA sawi danin, LRS department building hi May 12, 2009-ah a sakna turin work order a chhuak a, a sak nan Rs. 3,17,74,000 ruahman niin, a satu contractor chu H Sangchhunga, Vaivakawn, Aizawl a ni. May 25, 2009-ah sak ṭan niin, September 16, 2015-ah sak zawh a ni a, sak zawh aṭanga thla 22 hnu, July 11, 2017-ah hawn a ni.

Lalrinawma chuan, Aizawl district Settlement Officer pisa, chhawng (floor) ruk chu a sak hun chhung leh sum sên zatte ngaihtuahin, in ṭha leh tlo tak ni tura ngaih a nih thu sawiin, "Kumin July thlaa hawn ni si, tunah a chhuat ṭhenkhat a khawk dêr tawh a, a chhuat hi a nih dan tur ang taka cement, balu leh rora hmanga chhûn ni loin, balu chunga cement-a plaster tawp a ang hle," a ti a; hmun tam takah a chhuat a khawk tawh bakah, in chung aṭangin tui a lut nasa niin a sawi.

Building chu RCC ni mah se, mihring kal nghawrah ringawt pawh a insâwi che thei nia sawiin Lalrinawma chuan, "Thlí a nat deuh phei chuan a hlauhawm em em a, a luahtu staff-te tan a him lo a, 'Helmet nen office chhungah awm tur' te an ti hial a ni. He­tiang building, kal zawnga che thei leh thliin a chhêm nghîn theiha Congress sorkarin a sa hi vanduaithlak kan ti tak zet a ni," a ti.

MNF MLA-te chuan, Aizawl district Settlement Officer pisa building chu mihring chenna atan a him lo tih sawiin, chhiatna lian zawk a thlen hmaa endik a, siam ṭhat theih a nih chuan siam ṭha nghal turin sorkar an phût a, "Siam ṭhat emaw, a thara sak emaw a nih hma chuan office-a thawktute hi hmun him ngaihtuahsak turin sorkar kan phût bawk," an ti.

Cheng nuai 300 chuang sênga sak in a chhe lutuk leh kum 2015-a sak zawh tawh, kumina hawn a ni chauh chu mak an tih thu an sawi bawk.