Zirtirtute hian khawtlang nun siamthat Thlengin mawhphurhna an nei - CM Hawla

Mizoram Primary Teachers' Association (MPTA) chuan nimin khan Lal Thanhawla Auditorium-ah inkhawmpui an hmang a, chief minister Lal Thanhawla khuallian a ni. Chief Minister chuan, zirtirtute'n Mizo khawtlang nun siamṭhatna thlengin mawhphurhna an neih thu a sawi.

Lal Thanhawla chuan, ram hmasawnna tura sorkar hmalakna zawng zawngte chu a tawpah chuan zirnaah a innghat tih sawiin, "Mizo khawtlang nun siamṭhatna thlengin zirtirtute ṭangkaina leh mamawhna a nasa. A bikin primary school lut rual, zirlai naupangte rilruah hawihhâwmna, nu leh pa thu awih leh aia upa zah thiam hlutna leh hlawhtlinna bul a nihzia ni tin an rilrua tuh a pawimawh tak zet a ni," a ti.

Zirlai leh naupangte chu ram leh hnam hmabak, ram leh hnam innghahna a nih thu sawiin Chief Minister chuan, "Zirtirtute pawh ram leh hnam siamtute kan ti a, zirtirtu zingah pawh primary zirtirtute chu zirna in-

ṭanna hmuna naupang thluak insiam puitling chho mek, zirlaite an thiam tur thiamtirtute an ni," a ti a; zirtirtute chu an dinhmun hria a, an nun uluk turin a chah.

Inkhawma an tarlan danin, MPTA hi kum 1946-ah din a ni a, tun dinhmunah Mizoramah sorkar primary school 816-ah zirtirtu post hnawhkhah loh 882 a awm. Zirlai 40,550 awm mek a, chawhrualin sikul pakhatah zirtirtu 3.7 zel awm ang a ni.

Hun eng emaw ti chhung sorkar primary school teacher post ruak ṭhin 188 chu September 2016 khan hnawhkhah tura tihfel a ni a, headmaster-a kaisang zinga 60%-in an zawm tawh a ni.