ICFAI University-in convocation an hmang Inthlahdah loh tur - Larsap

ICFAI University, Mizoram chuan nimin khan Durtlanga an university campus-ah convocation vawi 6-na an hmang a; an hun hmanpuitu, Governor Lt.Gen. Nirbhay Sharma chuan, degree nei tharte chu inthlahdah lo turin a chah.

Governor chuan, convocation-a tel zirlaite chu a lawmpui thu sawiin, "Kan zirtirtu te, nu leh pate thawh rah a ni. In degree hmuh tharte hian thawhrimna a lantir a, hma lam hun tana rahbi pawimawh a ni. Vawiin hi hlimna ni a nih rualin, eizawnna a keng tel lo tih kan hriat nawn a pawimawh a, kan inthlahdah a thiang lo," a ti.

Mizoramah lehkhathiam hna hmu lo an pun zel thu sawiin Larsap chuan, "Mizoram leh India ram mai ni lo, khawvel ram dang thleng thei tur khawpa kan inpuahchah a ngai a ni," a ti a; Hindi chu kan ṭawng hman laite thlak tur ni loin, hnam dangte nena kan inbiakpawh nan leh sumdawn tawn nan thiam belh a ṭul thu a sawi.

ICFAI University vice vhancellor Lt.Gen. Dr Anil Kumar Misra chuan inlawmna thu a sawi a; zirlaite chu an zirtirtute thawhrimna leh nu leh pate inpekna hre reng a, khua leh tui ṭha ni turin a chah.

ICFAI University Mizoram aṭanga degree hmu tharte hi an vaiin mi 129 an ni a; MBA-ah mi 20, BBA-ah mi 45, BHTM-ah mi 15, M.A (Political Science)-ah mi 26, M.A (English)-ah mi 18 leh BCA-ah mi panga an ni.