MZP leh MJA-te an inkâwm

Mizo Zirlai Pawl (MZP) leh Mizoram Jour­­nalist Association (MJA) member-te chu nimin khan MZP pisaah an inkâwm a; ram tana ṭha tura an hriat hrang hrangte an sawiho.

Inkhawm hi MZP treasurer Michael Lal­ram­sanga'n a kaihruai a; MJA president Vanlalrema Vantawl chuan, MZP-te chu zirlai pawl an nih angin zirlaite tan theih-tawp chhuah se a duh thu a sawi a, "Zirlaite chanvo leh dikna leh an hmakhua lamah ke pên tam ula a ṭhain ka hria. In hmalakna reng rengah dan chhungah kal zel ula ṭha ka ti," a ti.

Vanlalrema Vantawl chuan, zirlai pawl hruaitute chu politics-a zuang lut tura ngaihna a awm ṭhin thu sawiin, "Hei hi kei chuan a sual ka ti lo," a ti a; politics-ah mithiam a tam thei ang ber zuang lut se tih chu a ngaihdan a nih thu a sawi.

MZP president L Ramdinliana Renthlei chuan, an term chhungin zirna an ngaih pawimawh dawn thu a sawi a, "Mizorama zirnain hma a sawn theihna atan theihtawp chhuah kan tum. Zirtirtu pakhat chauh awmna sikul Aizawl páwnah tam tak a la awm a, zirtirtu indaih lohna hi zirtirtu tlem vang ni loin, sem rual an nih loh vangah kan ngai. Zirtirtu sem rual a nih theihna atan hma kan la dawn a ni," a ti.

Hnam movement nasa taka kalpui an tum thu sawiin MZP President chuan, "Ram leh hnam tana thil kan tihnaah MZP-in a kuang lo nawr anga sawi kan hlawh ṭhin. Kan dan bu leh thil tum enin, MZP hian ram leh hnam leh zirlaite hmakhua atan chuan kuang a nei lo," a ti a; Mizoram ṭhatna tur a nih dawn chuan tih hreh an neih dawn loh thu a sawi.