Central YMA-in FIR an thehlut

Chakma Autonomous District Council (CADC) ṭhiah a nih theih nana Central YMA-in hmalak a tum chungchanga thu dik lo social media-a thehdarha puh, Paristo Chakma s/o Rangasur Chakma, Silsury, Mamit district lakah CYMA general secretary Lalhmachhuana chuan nimin khan Aizawl SP-ah FIR a thehlut.

Central YMA-in FIR an thehluhah chuan, Paristo Chakma chu Zo hnahthlakte inpumkhatna tichhe thei zawnga chea an ngaih thu an tarlang a, "Dan loa din CADC ṭhiah YMA General Conference-in a rel, kan unau Lai leh Mara-te tithlaphâng zawnga LADC leh MADC ṭhiah tel tum anga social media hmanga dik lo taka YMA min puhna hi 8.11.2017-a YMA Committee sang ber Central Coordination Committee chuan ṭha kan ti lo tak zet," tiin an ziak.

CYMA FIR-ah chuan, police-te chu hma laksak tur leh, Paristo Chakma chu man a, a thil tih phu tâwka hrem a nih theih nan hma la turin an ngen tih an ziak bawk.