Sorkar hnathawk ṭha lote'n sorkar Hnathawkte hmel an tibâl - P&E Minister

Power & Electricty minister R Lalzirliana chuan, sorkar hnathawk rinawm lo tlemtê vangin sorkar hnathawkte hmêl a balh ṭhin thu a sawi.

Power & Electricity Engineering Officers’ (PEOA)-in nimina inkhawmpui an neih a hmanpuinaah thu sawiin P&E Minister chuan, "Sorkar hnathawk rinawmlo tlemtê avangin sorkar hnathawk hmel a bâl ṭhin a. Hemi tireh tur hian mahni hna ṭheuh rinawm tak leh theihtawp chhuaha kan thawh a ngai a ni," a ti.

R Lalzirliana chuan, kawlphetha chu ram hmasawnna atana pawimawh ber pakhat leh mamawh ber pakhat a nih thu sawiin, "Kawlphetha enkawltu leh siam chhuaktu engineer rualte hi mithiam an nih angin beiseina sang tak nen mipuiin an thlir a ni," a ti a; mahni hnate hnehsawh taka enkawl tur leh thil thar leh chin dan thar ṭha zawkte hmang ve zung zung thei tura inzir reng turin PEOA member-te a chah.

PEOA conference hawnna inkhawm hi an president Vanlal Tlana'n a kaihruai a, general secretary Zothansanga'n an pawl hmalak dante leh hnathawh dante a sawifiah. PEOA-ah hian member 139 an awm mek a ni.