Duhthusam lote'n sorkar hna pawimawh An la chelh fur a hlauhawm - CM Hawla

Chief minister Lal Thanhawla chuan, tun hnaiah Mizoram aṭangin IAS leh IPS-a tling an tlem thu a sawi a, "Nakin lawkah chuan kan duhthusam leh kan lawm em em ni lêm lote'n sorkar hna pawimawh an la chelh fur a hlauhawm hle," a ti.

Mizoram Government Adhoc Aided High School Teachers’ Association (MIGAHTA)-in nimina Chanmari YMA Hall-a inkhawmpui an neih a hmanpuinaah Chief Minister chuan, "Tun hnaiah IAS-a tling kan tlem tawh hle a, IPS phei chu kum 1995 aṭang khan kan la awm lo a, Central Service danga inziak tling, sipai officer-a lut leh sipaia ṭang kan tlem tawlh tawlh a ni," a ti a; Mizote'n an chhevela hnam dangte an huphurh a, intihzahawm leh intihchak turin Mizote an ṭan a ngaih thu a sawi.

Zirtirtute chu mi pawimawh, hna pawi­mawh bik thawk an nih angin, Mizoram dinhmun leh sorkar hmalakna bakah, Mizoram hma lam chinchángte hriat tum tura chahin Lal Thanhawla chuan, "Pawl hniam ber aṭanga pawl sang ber zirtirtute chu ‘file nung’ khawihtute an ni a, an ni tin file chu zirlaite mi puitlinga chher tura zirtir a ni. Zirtirtute chu textbook chhunga mi chauh ni lo, páwn lam thiamna leh inpekna aṭanga zirtirna pe thei an nih a ngai," a ti.

Chief Minister chuan, duhâmna avangin Aizawl khawpui chhung a tâwt a, mi duhâmte lirthei hûn avangin vantlang kawngpui a chêp tih sawiin, "Compensentaion leh kutlingloa sum hmuh tumna avangin sorkar hmalakna lian tak tak a kal hlei thei lo. Hmalakna kal chak thei lo zinga mi, rel kawng phah mek pawh compensation dik lo taka phûttute vangin kum 2018-a zawh inbeisei, Railways thuneitute chuan kum 2022-ah pawh an zo hman dawn em tih an sawi ngam tawh lo," a ti a; dik lo taka zangnadawmna phûtte vanga hmasawnna a kal chak lo chu pawi a tih thu a sawi.

Zirtirtu leh sorkar hnathawk dang zawng zawng pawh ram siamṭhat nan mawhphurhna pek vek an nih thu sawiin CM Hawla chuan, "Ram hmasawnna atan rim taka thawk tura beisei an nih angin sorkharin an ham-ṭhatna tur pawh a dap reng a ni. Hlawh chungchangah pawh harsa lutuk loa an awm theih nan sorkarin ngaihtuahna a sêng mek a, Chief Secretary hoa Sub-Committee ṭhukhawm pawhin ngawrh takin hna an thawk mek a ni," a ti.

Khualzahawm, School Education minister H Rohluna chuan, zirlaite hmasawnna leh chher hna chu zirtirtute kuta nghah pumhlûm vek chi a nih loh thu leh nu leh pate thlawpna leh thawhpuina a pawimawh thu sawiin, "Zirlaite ṭha taka kaihhruai a nih theih nan zirtirtu leh zirlai nu leh pate chu thla khatah vawi khat tal a tlem berah inhmuh a ṭul," a ti a; exam result ṭha ringawt ûm a, bazar note hmanga zirlaite châwm ṭhan len a pawi thu a sawi.

MIGAHTA General Conference vawi 10-na hi hun thumah ṭhen a ni a, an member thi tawhte sûnna hun hman a nih bakah, MJA kaihhruaiin an pawl hruaitu turte thlan a ni.