MNF-in an hruaitute term an pawtsei

MNF party-a National Executive Committee chu nimin khan Central Hall, Venghluiah an ṭhukhawm a; tuna MNF headquarters-a office bearer-te term hman mek chu kum 2018-a Assembly inthlan tur avangin an pawtsei.

MNF tarlan danin, MNF general headquar­ters term kal mek chu November 2017 tawpah a tawp dawn a; mahse, kum 2018-a MLA General Election awm tur thlirin, general headquarters term kal mek chu pawhsei (extend) an rel a, General Hqrs. hruaitute thlanna chu MLA inthlan zawha neih turin an dah.

MNF National Exe­cutive Committee reso­lution chuan, Congress sorkarah kawngpui a chhia a, gas a harsa a, ration buhfai chhia a, zu zawrh vangin drug a hluar a, zu leh drug vanga thihna leh harsatna a thleng tam hle niin a tarlang a, "Corruption nasa lutukte avang hian Congress sorkar hi mipuiin thlak an duh tawh a, a siamṭha turin MNF-ah mipuiin beiseina sang tak an nei ta hi lawmawm kan ti," an ti a; mipuite beiseina tihhlawhtling turin MNF member zawng zawng ṭhahnemngai taka thawk turin an ngen.

MNF resolution chuan, Mizoram hmun tinah nasa takin hma an sawn nia sawiin, "Mipuite tan mahni inphat a, Zoram tluchhe mek Pathian leh kan ram tana tung ding turin Pu Zoramthanga kaihhruaina hnuaiah MNF chuan chak takin hma a la zel dawn a ni," a ti.