Mizoram BJP-te'n Joint NGO ngenna Chháng hmasa berah an inngai

BJP, Mizoram Pradesh president Dr JV Hluna chuan nimin khan Aizawl Press Club-ah thuthar thehdarhtute a kâwm a; zawhna chhangin, NGO Coordination Committee (Joint NGO)-in kum 2018-a Assembly inthlanah can­didate atan Chakma hmang lo tura an ngenna chu BJP-in an chhang hmasa ber niin a sawi.

Joint NGO hruaitute'n Assembly inthlanah Chakma candidate nei lo tura political party tin an ngenna chu BJP-in an chhang lo nia sawi chungchanga zawhna chhangin Dr JV Hluna chuan, "An ngenna hi kan chhang hmasa ber zawk ang. Joint Chairman (Central YMA President)-in min rawn bia a, national-a kan hotute thu hmu lo chuan Chakma dah leh dah loh chungchang kan la sawi theih loh thu ka hrilh," a ti. An chhanna hi ṭawngkaa an hrilh a ni a, ziakin chhanna an pek thu a sawi lo thung.

Kum 2018 inthlana candidate an neih dan tura zawhna dang chhángin Mizoram BJP hruaitute chuan, "Bial tinah a tling tur apiang kan candidate ang," an ti a; BJP national secretary (Scheduled Tribe Morcha) Bill Lotha-a'n tun hnaiah BJP-in bial 40-ah candidate an neih tur thu a sawi chungchangah erawh chuan, Lotha chu a sawi theitu a nih loh thu an sawi a, "Mizoram chungchang chu kan state president-in a sawi tur a ni," an ti.

Dr JV Hluna chuan, "Mizoram Assembly inthlanah party dang kan thawhpui lo ang," a ti a; Mizorama seat awm zawng zawng chuh tum mah se, national-a an hotute thu a nih thu a sawi bawk.

Chief minister Lal Thanhawla'n Mizo mipui tan hlauh tur dik chu BJP an nih thu a sawi chungchanga zawhna chhangin, Mizoram BJP hruaitute chuan, CM Lal Thanhawla chuan Mizoram politics-ah BJP aia hlauh a neih lohzia a tilang niin an sawi a, "Bible-in hlauh tur a tih a hlau lo a, hlauh loh tur a hlau thung," an ti.

Dr JV Hluna chuan, BJP state office leh district office aṭanga detailment/hriatpuina lehkha felfai tak keng loa Mizorama local unit, booth level, mandal level, district level leh morcha hrang hrang tlawhtute chu party anga dawnsawn loh tur a nih thu a sawi.

JV Hluna chuan, prime minister Narendra Modi-a'n tun hnaia a Cabinet a tihlena tel ve Alphons Kannanthanam chu Kristian a ni a, MP ni lo chunga minister-a ruat a nih thu sawiin, "BJP sorkarin MP ni lo Kristian pachal minister atana a dah hi Mizoram BJP chuan lawmawm kan tiin, kan chhuang tak zet a ni," a ti.