Candidate inchuh a awm dawn lo - Zoram Peoples' Movement

Ṭangrual Pawl, Zoram Peoples' Movement (ZPM) chuan thuchhuah siamin, kum 2018-a Assembly inthlan turah ZPM-ah chuan candidate, bial, minister leh chief minister inchuhnate a awm dawn lo niin an tarlang.

ZPM chuan, "ZPM - Ṭangrual Pawlte kalphung tharah chuan candidate inchuhna te, MLA bial inchuhna te, minister leh chief minister tur inchuhna te a awm dawn lo a, Steering Committee leh Val upa Council (VUC)-te kaihhruaina hnuaiah engkim rua­hman leh duan felin a awm vek dawn a ni," an ti.

Tun hmaa thawhhona awm ṭhin, mipui beisei kai phâk lo ram hlui zia kalphung ang chu ZPM hnuaiah tihbo a ni dawn nia sawiin ZPM chuan, "Kalphung tharah hi chuan ZPM-a ṭangho, pawl leh party-te'n chuti zat candidate kan chang ang a tih theih dawn loh," an ti a; ZPM uaptu advisory body-a Val Upa Council-te rorelna leh thutawp siamah ZPM-a pawl leh party-te an innghat vek tih an sawi.

ZPM chuan, "Kum 2018-ah chuan Congress leh MNF salbehna hnuaia kûn mek ram leh mipuite hi ZPM hmangin chhandamin an awm tawh dawn," an ti a; kum 30 chhung Congress leh MNF party-te'n Mizoram an sawpchhiat vanga retheihna leh pachhiatna bâwiha táng mek mipui hruai chhuak turin ZPM-in kalphung thar hmangin theihtawp chhuahin hma kan la mek zel niin an sawi.

ZPM thil tum ber chu kalphung thar hmanga Mizo hnam himna tling mipui sorkar din a nih thu sawiin ZPM chuan, "Ṭangrual Pawl auhla chu 'Kalphung thar - Mipui sorkar' tih a ni," an ti a; ZPM-ah political party te, ramvei pawl hrang hrangte leh mimal tu pawh, Mizoramah sorkar ṭha piantir duh apiang tel theihna a nih thu sawiin, sorkar ṭha a pian theih nan Mizoram mipuite thawhpuiah an sáwm.

ZPM thuchhuah tarlan danin, ZPM hian November 4, Inrinni aṭang hian Mizoram district headquarters tinah campaign beihpui an thlak dawn a, feh chhuak turin mi ṭhahnem tak an inpe tawh a ni.