Elelementary aṭangin Hindi zir ni se - Governor

Central Hindi Directorate bultumin nimin Mizoram Hindi Training College-ah 40th. Rashtriya Nagari Lipi Sammelan (National Civic Script Conference) hman a ni a; khuallian Lt.Gen. Nirbhay Sharma, Governor chuan, Mizoramah elementary level aṭangin Hindi zir ni se a duh thu a sawi.

Larsap chuan, hnam hrang hrangte ṭawngin an khawsak phung­ah hmun pawimawh a chan thu thu sawiin, "Mihringte inlaichìn nan leh hnam nun zia inhriathiam tawn nan a pawimawh. Mizoramah sorkar laipuiin Hindi chawikân tum ṭhin mah se, hma a la sawn thei tak tak rih lo. Mizote'n Hindi tun aia chak zawka an thiam theih nan chuan tihluihna tel loin sikulah pawl hniam ber aṭanga zirtir ni se a ṭha ang," a ti.

Hnam hrang hrangte'n entawn tlak nun zia an neih thu sawiin Governor chuan, "Chîn dan ṭha, hnam dang ṭawnga inziakte chu Mizo leh Hindi ṭawnga lehlin tawn ni se a duhawm hle," a ti a; Hindi chu Mizo ṭawng tibo tur ni loin, India rama hnam hrang hrangte inpumkhat nan ṭha a tih thu a sawi.

Higher & Technical Education director R Lalrosanga pawhin thu sawiin, Mizoram Hindi Training College din a nih dan a sawi a, "MHTC hi Mizoram University nena thlun zawm ni se a duhawm hle. MZU nen thlun zawm a nih chuan University Grants Commission kaltlangin ṭanpuina an dawng thei dawn a ni," a ti.

Inkhawmah hian Council of Nagari Lipi chuan Nagari Award an sem a; Mizo zingah Robert Romawia Royte, Dr Louis Hauhnar, VR Ralte leh Dr Lalengzami hlan a ni.