Rúlhût damdawi pek beihpui thlak

AH&Vety department bultumin nimin khan Mizoram hmun hrang hranga kalpui tur, National Livestock Missions hnuaia vawk rúlhût damdawi pek beihpui thlakna (Deworming in Pigs) hawn a ni.

Beihpui thlak hi Serchhipah chuan State Vety Dispensary-ah hman a ni a; Khawlailung leh Serchhip aṭangin vawk vulhtu kalkhawmte chu rúlhût laka an vawk vulh­te venhim dan leh a damdawi pek dante zirtir a nih bakah, vawk ṭhahnem tak rúlhût damdawi pek nghal a ni.

Rúlhût damdawi beihpui thlakna hun hi Siaha-ah chuan DC conference hall-ah hman a ni a, district bawrhsap Harleen Kaur-i'n a hmanpui.

Harleen Kaur chuan, "Kan ran vulhte zingah vawksa hi kan ei tlángláwn ber a ni. Vawk leh a vulhtu mihringteah natna inkai chhawn theih tam tak a awm a, chu'ng zing­ah kan district-a hluar ber chu rúlhût hi a ni awm e. Kan ran vulhte an hrisel chuan a sa eitute pawh kan hrisel mai dawn a ni," a ti.

Lawngtlaiah chuan AH&Vety Complex-ah hun hman a ni a, khuallian, LADC chief executive member T Zakunga chuan, kut hnathawktute chu ram innghahna an nih thu sawiin, "An hnaa an rinawm phawt chuan ramin hma a sawn zel dawn. Ran vulh hi eizawnna tlak leh mahni dinhmun sawh nghehna atana thlan­awm ber pawl a ni," a ti.

Lawngtlai DVO Dr B Zonghinga chuan, State Deworming Day hman a nih chhan leh a thil tumte a sawifiah a; mihringin natna a kai theih 70% chu ran vulh aṭanga kai a nih avangin, ran vulhte hriselna chu ngaihthah a thian loh thu a sawi.