College zirtirtute'n inkhawmpui an hmang

Mizoram College Teachers Association (MCTA) chuan nimin khan Champhai College-ah inkhawmpui an hmang a, Higher & Technical Education (HTE) minister R Romawia'n a hmanpui.

R Romawia chuan, zirtirtu leh zirlai ṭha leh thiamte chu ram leh hnam tan rohlu an nih thu sawiin, "Sorkar leh MCTA-in thawhhona ṭha tak an nei hian ram leh hnam tana thawh dunnaah rah ṭha tak a chhuah ka beisei. College zirtirtu indaih lohna sorkarin a hriatpui a, mamawh zualte phuhrûk a nih theih nan hmalak mek a ni," a ti.

College zirtirtute chu indaih lo hle chung­a result ṭha tak an nei thei chu fakawm a tih thu sawiin R Romawia chuan, "Zirlai, ram leh hnam tana chhhawr tlak leh innghahna tlak chher chhuah kawngah nasa lehzuala ṭan lak a pawimawh," a ti a; college-a library changtlung tak leh thawktu an awm chu thiamna zir kawngah a pawimawh thu a sawi.

HTE Minister chuan, RUSA scheme hnuaiah college hrang hrangahte hmasawnna ruhrel hmuh theiha a awm thu a sawi a, "Tun thlenga RUSA kaltlanga sum hmuh tawh chu cheng vbc. 80.8 a ni. Central aṭanga college tana fund lo kalte hi felfai leh dik taka hman ṭhin a ni," a ti.

MCTA inkhawmpui hi an vice president H Lalnunmawia'n a kai­hruai a, president Dr PL Ram­liana'n kalkhawmte lawmna thu a sawi.

MCTA hi September 7, 1979-ah din a ni a, college/branch 23 an awm. MCTA data-in a tarlan dan chuan, tun dinhmunah Mizoram sorkarah college zirtirtu 632 an awm a, college zirtirtu post 19.46% chu hnawhkhah lohin a awm mek a; contract leh part time zirtirtu 215 an awm bawk.