Buhfai chhia sem lo turin sorkar phût

MNF ṭhalai (MNYF) headquarters hruaitute chuan nimin khan Zuangtuia Food, Civil Supplies and Consumer Affairs (FCSCA) kudama buhfai dinhmun an enfiah a; buhfai chhia, sem tawh lo turin Mizoram sorkar an phût.

MNYF chuan, tun hnaia Mizoram sorkar­in mipui hnena ration buhfai a sem ṭhinah ei tlak mang loh leh buhfai chhia a tam hle nia sawiin, "Tun hnuah chuan buhfai chhia, mipui ei atana tlak loh sem tawh lo turin Mizoram sorkar kan phût tak zet a, sorkar hmalakna an en zui zel dawn a ni," an ti.

Zuangtuia Supply kudam an enfiahnaah MNYF vice president Lalremruata Chhangte chuan, "Mizoram sor­kar hian a enkawl mipui VIP min tihte tan kawng ṭha min pek theih loh laia buhfai chhia leh zel min hlui hi thil lung­chhiatthlak a ni," a ti a; Supply kudam an tlawh chu sorkar tihmualpho an duh vang ni loin, mipuiin ration buhfai ṭha kan dawn theihna tura sorkar an nawrna a nih thu a sawi.

MNYF Vice President chuan, buhfai chhia mipui hnena sem chhuah tawh lohna tura sorkarin Zuangtui kudama a dah buhfai ip tam tak chu a rang thei ang bera kudam aṭanga la chhuak turin sorkar an phût tih a sawi bawk.