KHAWTHLIR

ART centre
India rama non-governmental organisation (NGO) zinga HIV veite damdawi, Anti Retroviral Therapy (ART) damdawi pe chhuak hmasa ber tur, Positive Women Network of Mizoram (PWNM) pisa, Upper Khatlaa ART pek chhuahna tur chu nimin khan MSACS-a epidemiogist Dr Richard Lalramhluna'n a hawng. PWNM hi HIV darh zel tur venna leh a kai tawhte kawnga hma la tura din a ni a; HIV Alliance India hnuaiah HIV Positive Care & Support an enkawl bakah, MSLA hnuaiah Legal Aid Clinic an kalpui mek a, nimin aṭang khan ART centre angin ART damdawi an pe chhuak ni.

Felfai taka Kalpui duh
Pre-Service Teacher Association of Mizoram (PRESTA) chuan thu­chhuah siamin, sorkarin zirtirtu, middle teacher post 60 leh primary teacher post 100 a lak tur chu felfai taka kalpui an duh thu an tarlang a, "Zirtirtu lak turte chu dilna lehkha thehluh rualin document kimchang thehluh a ngai a. Hemi chungchangah hian ngaihhnathiam tâwk an awm dawn niin kan lo hria a, hei hi a fel lo kan ti," an ti.

Tlân phal lo
Traffic SP C Lalthanmawia chuan thupek chhuahin, vawiin aṭangin Vaivakawn aṭanga Ropaiabawk inkar (Zohnuai-Ropaiabawk) kawng leh Vaivakawna Hunthar pêng aṭanga Company pêng inkar kawngpui siamṭhat hna thawh a ni dawn tih a tarlang a; hei vang hian heng kawngpuiah hian zing dar 8 aṭanga tlai dar 5 inkarah lirthei tlan phal a nih dawn loh thu a puang.

Week khâr
Johnson College chuan nimin khan Lal Thanhawla Auditorium-ah College Week khârna hun an hmang a, minister R Lalzirliana'n a hmanpui. Minister chuan, zirlaite chu theihtawp chhuaha zir theih zawng zawng zir a, thiamna sang tak nena ram rawngbawltu ni turin a chah. Johnson College hi kum 1993-ah din a ni a, zirlai 857 leh zirtirtu 25 an awm mek a ni.