Eirûkna - hlemhlêtna a reh theih nan YMA-in chak zawka hmalak an rel

YMA Rorel Inkhawm vawi 3-na chu nimin khan Thingsulthliah khelmuala pandal sak, Zawlbuk Rúnah neih a ni. Eirûkna leh hlemhlêtna a reh theih nan chak zawka hmalak leh, Myanmar ráltlân hmun hrang hranga awm darhte an awm khawm theih nan sorkarin relief camp changtlung a siam theih nan leh relief camp-ah dah vek an nih theih nan hmalak an rêl.

YMA Rorel Inkhawm hi Central YMA president R Lalngheta'n a kaihruai a, rorel palai 1,452 an kal a; "Myanmar aṭanga ráltlânte hmun hrang hranga awm darh hian harsatna lian zawk min la thlen thei dawna a lan avangin, sorkarin relief camp changtlung zawk siam tur leh chumi-ah chuan dah vek tura hma la turin sorkar lamah CYMA-in hma la rawh se," an ti a ni.

"Eirûkna leh hlemhlêtna a reh theih nan CYMA-in tun aia chak zawkin hma la rawh se," tiin an rêl a; YMA General Conference leh Rorel Inkhawm pualin YMA member tinah Rs 5 khawn ṭhin an rél bawk.

Finance report-a a lan danin, kum 2021-22 chhunga CYMA sum hmuh zawng zawng chu Rs 5,25,12,599.62 a ni a, Rs 1,80,70,265 hman niin, hman bâng Rs 3,44,42,334.12 a la awm. CYMA Treasurer-in kum 2022-23 chhunga CYMA budget a pharh, Rs 1,68,80,400 chu pawm a ni.

Rorel inkhawmah hian CYMA general secretary Prof. Lalnuntluanga'n report pein, General Conference 2021 leh Rorel 2022 inkara CYMA hmalaknate a tarlang a, CYMA finance secretary Roneihthanga'n sum dinhmun a sawifiah, treasurer Fabian Lalfakawma'n CYMA 2022-23 budget a pharh bawk.

Nikum YMA General Conference leh kumina Rorel inkara YMA member thi mi 1,347 sûnna hun CEC member RL Zomawia kaihhruaiin neih a ni a; tuihna humhalh ṭha, branch chanchinbu ṭha, YMA Chanchinbu la ṭha leh ramngaw leh nungcha humhalh ṭhate hnenah lawmman hlan a ni.

Nizan khan vantlang inkhawm neih a ni a, CYMA vice president Lalhmachhuana'n a kaihruai. CYMA President-in thu a sawi bakah, General Secretary-in YMA kumpuan 'Ram leh hnam humhalh' tih a sawi a; assistant secretary Prof. Malsawmliana kaihhruaiin hruaitu hlui chawimawina hlan a ni. Kumpuan bawhzui ṭha lawmman sem a ni bawk.