SEDP ṭanpuina dawngtute pawisa chhuhsakah MPCC-in MNF an puh

Mizoram Pradesh Congress Committee (MPCC) chuan, Socio Economic Development Programme (SEDP) hnuaia sum sem Rs 25,000 dawngtute pawisa dawn zinga eng emaw zat chu MNF party-in an chhuhsak nia sawiin, SEDP dawngtute leh mipui hmuhsitnaa an ngaih thu an tarlang.

MPCC thuchhuah chuan, MNF-in Mizorama chhungkaw tinte SEDP aṭangin Rs 3,00,000 pek an tiam laiin, kum li an sorkar chhungin chhungkaw tlémtê hnenah Rs 25,000 an sem thei hram tih a tarlang a, "SEDP dawngtu mi rethei zawkte pawisa dawn aṭangin hnam party inti ṭhin MNF party-in Rs 500 te, Rs 1,000-te an chhuhsak thung," a ti.

MPCC tarlan danin, minister Lalchhandama bial, Tuivawl constituency-a khaw eng emaw zatah SEDP ṭanpuina dawngtute pawisa dawn chu MNF party-in an chhuhsak. Sakawrdai, Zokhawthiang leh Vaitin khuaahte chhungkaw 200 chuangin SEDP sum Rs 25,000 zel an dawn aṭangin MNF-in Rs 500 zel an chhuh a, N Khawdungseiah chhungkaw 13-te pawisa Rs 1,000 ṭheuh an chhuhsak a ni.

Ṭinghmunah chhungkaw 60-in dawngin, Rs 1,050 zel an chhuhsak a, Mauchàrah hian chhungkaw 70 chuangin dawngin, Rs 100 zel an chhuhsak a; New Vervekah pawh sum sem leh hunah chhuhsak ngei an tum thu MNF hruaitute'n an sawi bawk.

MPYCC chuan, MNF president Zoramthanga'n Mizorama chhungkaw tin, NLUP dawng tawhte pawh SEDP aṭangin Rs 3,00,000 pek a tiam tih sawiin, "Rs 25,000-in an sem thei hrâm a, Rs 2,75,000 an la bá tihna a ni a, la dawng lote lakah Rs 3,00,000 zel an la ba bawk. An intiam zat hmun 10-a ṭhena hmun khat pawh an sem theih loh laia a dawng awm chhunte an la chhuhsak duh hi mak kan ti a, SEDP dawngtute leh mipui hmuhsitna dik takah kan ngai," an ti.

Congress party chuan, SEDP hnuaia sum sem chu MNF party pawisa a ni lo a, sorkar pawisa, mipui chhiah pek tling khawm, Mizoram budget-a mi a nih thu sawiin, "Kan chhiah pek tling khawm aṭanga MNF party-in an duh zat zat an ṭhâm ṭhen ringawt hi hriatthiam theih a ni lo a, MNF-in Mizoram leh a chhunga chengte an hmangaih lohzia tilang chiangtu a ni," an ti a; SEDP dawngtute pawisa an chhuhsakte chu pe kîr leh turin an phût a ni.