Hachhek bialah total bandh kalpui an tum

Hachhek Bial Kuhva Chingtu Pawl leh Hachhek biala pawl hrang hrangte nimina Kawrthah YMA Rûna ṭhukhawm chuan, Hachhek biala kuhva tharte hralh chungchanga an harsatna tun thlenga sutkian a la nih loh avanga sorkar laka lungawi lohna lantir nan November 1, 2022 aṭangin tiam chin awm loa total bandh kalpui an rél.

HBKCP leh NGO-te ruahman dan chuan, October 31, 2022 zanlai thlenga sorkar aṭanga thu lawmawm an hmuh loh chuan total bandh kalpui an tum a; total bandh neih chhungin dawr, zirna-in, sorkar pisa leh kawngpui khâr vek an tum a ni.

Nimina HBKCP leh NGO-te ṭhukhawm chuan, an kuhva tharte hralh mumal theih a nih loh avanga an harsatnate vawi tam tak sorkar hotute hnena an thlen hnu pawha tun thlenga sutkian a la ni lo chu hriatthiam harsa an tih thu, resolution siamin an tarlang.

Cachar district lamah Mizorama thar kuhva hralhna leh thiar velnaah ruahmanna siam fel a nih tawh laia Karimganj district lama harsatna a la awm reng chu Mizoram sorkar hmalak chak tawk loh vangah an ngaih thu leh, October 31, 2022 ral hmaa chingfel turin Mizoram sorkar an phût tih an tarlang bawk.

HBKCP leh NGO dangte chuan, kuhva thartute harsatna sukiang tura sorkar a che lo a, kumin chhunga an kuhva tharte hralh mumal loh vanga a rîral a nih chuan, kuhva chíngtute hnenah zangnadawmna atan nikum lama an thar chhuah zat hû, cheng nuai 2,750 vel tal pe turin Mizoram sorkar an phût bawk.