KHAWTHLIR
Keifang Venglai VC by-election
October 26, Nilaini khan seat panga awmna Keifang Venglai Village Council by-election neih a ni a, zanah vote chhiar nghal niin, ZPM-in seat pali leh MNF-in seat pakhat an la. ZPM president Lalliansawta chuan thuchhuah siamin, Pathian leh mipui zarah Keifang Venglai VC-ah an chak chu lawmawm a tih thu leh tlingte a lawmpui thu a tarlang.
Thisen pe
Champhai College-a National Cadet Corps chuan nimin khan Champhai District Hospital-ah thisen unit 20 an pe a, petute mipa 16 leh hmeichhia pali an ni. Mamit College NSS pawhin nimin khan District Hospital-ah thisen unit 9 an pe bawk.
Lirthei khu endik
Mizoram Pollution Control Board-in Bharat Stage (BS) I, II leh III-te lirthei khû endik hun tura a ruat October 2022 chu a tawp dawn tawh avangin, November 1, 2022 aṭanga thu leh awm hma chu BS IV leh VI lirtheite pawh endik ve tawh tur a nih thu sorkar thuchhuakin a tarlang.
MCO hawng
Minister of state Robert Romawia Royte, Mizo Cultural Organisation (MCO) president ni bawk chuan October 26, Nilaini zan khan Hnahthial Electric Veng community hall-ah MCO Sub-Headquarters, Hnahthial a hawng. Minister chuan, hnam nun leh zia chawisan leh venhim thuah YMA, MHIP, MUP leh páwl dangte hmalakna leh MCO hmalakna chu inpui tawn zela kalpui a ṭul thu a sawi.
Intlàn chhâwk hun
Traffic SP Rodingliana Chawngthu chuan, November thla chhungin Aizawl khawpuia taxi-te chu zing dar 9:30 aṭanga tlai dar 5 inkarah intlân chhâwk tur a nih thu a tarlang. Taxi intlân chhâwk hun atana ruahmanna thar hi lirthei che vêl a nghawng dan azirin hman chhunzawm emaw, tihtawp emaw a ni ang.
CM-in tlangzarh
Dr C Biakmawia lehkhabu ziah, 'Nghilh loh nan' tih leh leh 'Lest we forget' tihte chu nimin khan chief minister Zoramthanga'n Aijal Club-ah a tlangzarh.
Faina beihpui thlak
Tuichang bialtu MLA Tawnluia, deputy chief minister hoin nimin khan a bial chhunga Khawzawl Zaingen Hall-ah faina beihpui thlak hun hman a ni. Deputy CM hian Khawzawl veng hrang hranga chhungkaw thlante hnenah bawlhhlawh ṭawih thei leh ṭawih thei lo paihna tur bawlhhlawh báwm a sem a; veng hrang hranga sem turin veng tin VC te hnenah bawlhhlawh báwm a hlan bawk.
Nurse pual zirhona
Labour, Employment, Skill Development & Entrepreneurship department chuan nimin khan Laipuitlanga Verdant Multipurpose Hall-ah Mizo ṭhalaite'n Japan rama nursing hna an thawh theihna tur zirhona an buatsaih a; Mission Foundation Movement School of Nursing, Blessino Nursing School, BN College of Nursing leh School of Nursing, Thingdawl aṭangin nurse zirlai 100 vel an tel.
ELC kalpui dan tur sawiho
Lunglei DC Kulothungan A kaihhruaiin nimin khan sikul leh college zirlaite'n inthlan kaihnawih thil pawimawh an zirna tura Election Commission of India hmalakna, Electoral Literacy Club (ELC) chu Lunglei district zirna-ina kalpui dan tur sawiho a ni. High school chin chunglam zirna-inah ELC din a ni tawh a, kumin November aṭanga neih tur Special Summary Revision of Electoral Rolls denchhenin district chhungah thil hrang hrang tih tum a ni.
Hmalakna thlirho
Lunglei District Task Force for Immunization chu an chairman Kulothungan A, bawrhsap hoin nimin khan an ṭhu a, an hmalakna leh hmachhawpte an thlirho. Lunglei district-ah kumin January-October chhungin vaccine preventable disease test - APF paruk, MR 52, Diphtheria pali leh Pertusis pakhat a awm thu tarlan a ni.
ATI-in Graduation Day an hmang
Mizoram UPC Pathian thu zirna, Apostolic Theological Institute (ATI) chuan nimin khan an chapel-ah ATI Silver Jubilee kharna leh Graduation Day an hmang a, zirlai chhuak tur mi 21 hnenah Mizoram UPC general secretary Rev. Saienga Sailo-in graduation certificate a hlân. Inkhawm hi ATI principal Rev. P Lalrinawma'n a kaihruai a, general superintendent Rev. Thangliansanga'n graduate-te ṭawngṭaisakna leh fuihna hun a hmang. ATI hi June 2, 1997-ah bul ṭan a ni a, Durtlang lal M Suaka in luah hawhin Durtlang Mual Vengah bul ṭan a ni. Tunah hian zirlai 49 an awm mek a, mipa 44 leh hmeichhia panga an ni.