ZPM hi beiseina awmchhun a ni - Lalduhoma
ZPM leader Lalduhoma chuan, ram leh hnam dinchhuah nan sorkar dik leh ṭha Mizoramin a mamawh thu leh mi tam takin ZPM chu Mizoram beiseina awmchhuna an ngaih a nih thu a sawi.
Lalduhoma hian Hrangturzo bial fangin, Nilaini zan khan Biatea Zialung Hall-ah leh nimin zing khan East Lungdar bazar kâwna vantlang inkhawmah thu a sawi a, "Kan ram leh hnam dinchhuah nan sorkar dik leh ṭha kan mamawh. Kan ram hmelma lian ber chu eirûkna a ni a, eiruk hmangte i hnâwl ngam tawh ang u. Hetiang lama kohhran an ṭhangharh hi kan lawm hle a ni," a ti.
ZPM party chu mi tam takin Mizoram beiseina awm chhun nia an hriat avangin ZPM an zawm zel nia sawiin Duhoma chuan, "Sorkarna siam turin theih ang angin kan inbuatsaih a, mithiam rualte nen ni 100 chhunga kan tih tur te, kum khat chhunga kan tih tur te, kum hnih chhunga kan tih turte kan duang vek tawh," a ti a; mihring lama inbuatsaihnaah chuan an inpeih tawh thu a sawi.
ZPM leader Lalduhoma chuan, "Party hian ral lam kan pan tawh chuan eng mah khelh chhuah tur a awm tawh ṭhin lo a, tunah hian Congress unaute tan hun a liam mek a ni," a ti a, Congress party mite chu an thiamna, ngaihtuahna leh ram tana an lo sên tawhnate ZPM kaltlanga tihlawhtling turin a sáwm. ZPM chu party naupang tê an nih thu sawiin, "A tìr aṭangin dotu kan ngah. President-ah an buai ang, chief minister-ah an buai ang an ti ṭhin a, kan buai lo a ni," a ti.
Hmasawn tak tak turin kawngpui ṭha a ngaih thu sawiin Lalduhoma chuan, "Contract hna inpek danah EPC system kan hmang dawn. Contractor-te hnathawh reng reng a hunah zawh a awm thei lo a, revised estimate a awm reng a, hengte hi kan sorkar chuan dan ang thlapin contractor-te hna pein kan thawk dawn a ni," a ti a; party ṭhenkhat chuan Mizoramah ZPM a sorkar ang a, Mizoram a intodelh an hlau niin a sawi.
Lalduhoma chuan, sorkar laipui aṭangin scheme tam tak a awm tih sawiin, "Tu pawh sorkar se, a awm reng dawn. State sorkar tiha sawite an awm ṭhin a, party hamṭhat nan leh campaign nan hmang an awm ṭhin. Central scheme ṭha tak takte hi a hmanna tura hman a nih ṭhin loh avangin ramin a tuar em em a ni," a ti.