Minister-te'n MZP Assembly an hmanpui

Darzo khuaa MZP Assembly vawi 66-na chu October 26, Nilaini khan minister of state Robert Romawia Royte leh nimin khan School Education minister Lalchhandama Ralte-te'n an hmanpui. Education Minister chuan, "Themthiamna leh infiamnate hi zirna pangngai ang chiaha kalpui a ni dawn a, zirna hmel thar a lang dawn a ni," a ti.

Nilainia vantlang inkhawmah Robert Romawia Royte chuan, ruihhloin Mizoram a tibuai nasa tih sawiin, "A bikin mipain nunna an chàn phah nasa. Mizo mipa kan tlem tial tial a, electoral roll-ah pawh kan tlem zel hi a veiawm tak zet," a ti a; ṭhalaite chu ruihhlo laka fihlim tur leh ruihhlo donaah mahni zâwn ṭheuha ke pên turin a chah.

MZP Assembly chu kawng hrang hranga zirlaite tiphûrtu leh chona thar siamtu a nih a beisei thu sawiin Robert Romawia chuan, "Zirlai pawlte hi ram leh hnam humhalh kawnga pên chhuak ṭhin leh ṭhalaite hmakhua ngaia ṭhahnemngai taka hma la ṭhin an nih angin, Mizo mipuite'n kan ngaihhlut thiam a pawimawh," a ti.

Nimina inkhawmah Lalchhandama Ralte chuan, Mizote chu hnam tlêm an nih avangin insawisel mai lo a, ṭan rual a ṭul thu sawiin, Mizo nun ze mawi tuaithar turin ṭhalaite a chah a; Mizoram sorkarin October 7 chu Zirlaite Ni atan a puang tawh tih sawiin, "He ní hi zirlaite tan ruihhlo leh HIV laka fihlîm inzirtir nan te, aia upa zahna leh Mizo nationalism inzirtir tharna hun atana hman ni se a ṭha hle ang," a ti.

Lalchhandama Ralte chuan, ram hruaitute an famkim bik lo tih sawiin, "Zahlo taka sawisel mai loin, ṭawngṭaipui ṭhin ang u. Kan ramin a mamawh em em chu central service-a luh tam a ni a, Mizo zirlaite'n kan tum chuan kan thei a ni," a ti a; Pathian ṭih a, ram leh hnam vei chunga lehkha zir turin zirlaite a chah.

MZP president Lalnunmawia Pautu pawhin thu sawiin, zirlaite chu an nu leh pate vanga tun dinhmun thleng thei an ni tih hriaa nu leh pate chawimawia ngaisang reng turin a chah a, "Mihringte hi nung ve tawp turin min duang lo a, keimahniah theihna leh thiamna a awm a, chumi hmang ṭangkai thiam tur chuan theihtawp kan chhuah a pawimawh," a ti.

MZP President chuan, "Kan hnam ziaráng kan humhalha kan chawi lâr a pawimawh a, kan ṭawng leh kan hnam ziarângte kan vawng him tur a ni," a ti a; Mizo mipate social media-ah an ṭawng tam thu sawiin, zirlaite'n smart phone a ṭha zawnga an hman a pawimawh thu a sawi bawk.