Governor thu sawi sorkar tan a mualphothlak - ZPM Ṭhalai

ZPM Ṭhalai chuan thuchhuah siamin, Goverbor Hari Babu Kambhampati-a'n Mizoram State Health Care Scheme-ah mi tam zawk an inziah luh theihna turin ṭan lâk a ngaih thu sorkar thuneitute hnena a sawi chu Mizoram sorkar tan mualphothlak an tih thu an tarlang.

ZPM ṭhalaite chuan, MSHCS-a inziak lut chu nikum aiin kuminah 45%-a an tlem thu sawiin, inziak lût a kum têla an tlém chuan MNF sorkarah mipuiin rinna an nghah ngam tawh lohzia a tichiang tih an sawi a, "Chief Minister berin, 'A damlo apiangin an hman turin SEDP-ah cheng nuai hnih thlengin kan dah,' a tih pawh term tàwp dawn thlengin mumang ram mai a la nih avangin Lársap pawh a mangang niin a lang," an ti.

Governor a au chhuak ta chuan MNF sorkar hlawhchhamzia chiang takin a tilang tih sawiin ZPM Ṭhalai chuan, "MNF sorkarin MSHCS a ngaihthah vanga mipui mangang au ráwlin sorkar a kai harh zawh lo a, Lársap meuh a ṭawng chhuah a ngai ta hi pawi kan ti," an ti a; mipui himna tur ngaihtuah leh Governor thu âwiha MSHCS ngaihsak turin sorkar an phût a ni.

ZPM Ṭhalai chuan, Ministry of Tribal Affairs-in tribal scholarship tur cheng nuai 3,590.31 a pek tawh, Mizoram Finance department-in tun thlenga Mizoram Scholarship Board a la pe lo chu hriatthiam har an tih thu an tarlang bawk a, "MNF sorkarin zirlaite a hmuhsitnaah kan ngai. Scholarship sum a bo a bâng awm loa zirlaite account-a thun thuai turin sorkar kan phût a ni," an ti.