MICE sak dan sawifiah turin Minister phût

Mizoram Pradesh Youth Congress Com-mittee (MPYCC) chuan thuchhuah siamin, Mizoram Institute of Comprehensive Educa-tion (MICE) High School leh Higher Secondary School building sak a ṭha tâwk lo niin an tarlang a, sikul sak dan sawifiah turin School Education Minister an phût.

MPYCC chuan, MICE HS leh HSS building, Tuikuala sak chu a ṭhat tâwk loh thu an dawn avangin October 26, 2022 khan an enfiah tih sawiin, "Building sak zawh tawh hi eng vanga tun thlenga la luah loh nge a nih, estimate leh drawing anga sak a ni em, tih sawifiah thuai tur leh a hmuna tlawh ve ngei turin Education Minister kan phût a ni," an ti.

MPYCC tarlan danin, sikul varandah tlâkdâl a nghet tâwk lo a, chhâwng lina tukverh sáng takah tlâkdâl siam a ni lo a, septic tank a tê hle a, tuihâwk luanna mumal taka siam a ni lo.

Congress ṭhalaite chuan, MICE building sakna tur sum chu Congress sorkar laia NEDP aṭanga pek a nih thu sawiin, "Luah ṭhat ngam loh khawpa sak a ni hi pawi kan ti em em a ni. Zirlaite'n ngaihngam taka an luah thuai theih nan a ṭul anga hma la tur leh in sak dante sawifiah turin Education Minister kan phût," an ti.

NABARD sum hmanga Mizoram khaw hrang hranga sikul sak ṭhat leh thawm ṭhatah pawisa luang ral tam tak a awm thu Assembly House-ah sawi a nih tawh avangin, School Education Minister chungah rinna nghah harsa an tih thu MPYCC chuan an tarlang bawk.