Zirlaite fee pek zirna-in hmasawn nan A tam thei ang hman MZP-in an duh

MZP Assembly vawi 66-na Darzo khuaa neihah nimin zing khan rorel a ni a; Mizoram sorkar enkawl zirna-ina fee kalphung ennawn a, a tam thei ang ber zirnain hma a sawn theihna atana hman a nih theih nan hmalak an rêl.

MZP hian zirna-ina zirlaite'n fee an pekte chu a tam thei ang ber zirna hmasawnna atana hman an rêl bakah, "RUSA kal­tlanga college hrang hrang sak/thawm ṭhat hi a hun taka zawh a nih theih nan hmalak ni rawh se,” an ti a; post matric scholarship-a Mizoram sorkar tum ve tur (state matching share) a hun taka pek chhuah a nih theih nan leh Mizoram sorkarin sorkar college-te bus a ngaihtuahsak theih nan hmalak an rêl a ni.

An rorel zingah, Mizo­rama NHIDCL hnuaia kawng laih hna thawh mekte a nih dan tur dik taka thawh a nih theih nan enfiaha hmalak te, Mizoram sorkar hnuaia hna lakah Mizo ṭawng middle school standard tih chu exam ngei a nih theih nan hmalak te, Mizorama insurance company-te'n insurance diltute harsatna an siam ṭhin chu chinfel a nih theih nana hmalakte a tel bawk.

MZP Assembly hi October 25, 2022 zan khan ṭan a ni a, nizan khan a ṭiak a ni.