Kohli-a'n India a chakpui leh ta

Pakistan laka ropui taka a chet hnuah Virat Kohli-a'n India tan a theihna a pholang leh ta a, nimin khan T20 World Cup match-ah India tan run 62 zet siamin Men in Blue a chakpui leh ta - India hian Netherlands chu run 56-in an hneh a ni.

Sydney Cricket Ground, Sydney khawpuia inkhelah, ṭhumvawrah India an vannei zawk a, bat hmasak an thlang. India tan opener KL Rahul-a'n run kua chiah rawn siam mah se, captain Rohit Sharma leh Virat Kohli an che ropui.

Super 12 match inkhelah Kohli hian ball 44 hmachhawnin run 62 ngawt a vaw chhuak a, a tawp thlengin a dam - captain Rohit Sharma pawhin ball 39-ah run 53 ngawt a siam a, a out hian over 11.6-ah India-in run 84 an siam tawh a, a hlauhthawnawm lo.

Rohit Sharma 'out' hnuah Suryakumar Yadav a che chhe bik lo - ball 25 lekah run 51 rawn siamin Kohli nen a tawp thleng an dam a, Men in Blue hian over 20-ah run 179 siamin wicket hnih chiah an hloh.

Netherlands bat hun a thleng a, mahse, an ropui lo - Cheema Khurd, Punjab, India-a piang, kum 19 mi Vikram Singh chu Max O'Dowd nen an rawn ding dun a, mahse, Vikram hian run khat chiah siamin a out a, O'Dowd pawhin run 16 bak a tlin lo.

Netherlands tana run siam hnem ber Tim Pringle chuan run 20 a rawn tlin ve hram a, over 20 chhunga wicket kua hlohin run 123 chiah an tlin a, India an chak chiang.

Men in Blue tan Ravi-chandran Ashwin, Bhuvnes-hwar Kumar, Arshdeep Singh leh Axar Patel ten wicket hnih ṭheuh an la a, Mohammed Shami chuan wicket khat a la ve bawk.