LMC inthlan buatsaih turin Mizoram sorkar a la inpeih lo

Lunglei Municipal Council (LMC) inthlan buatsaih turin Mizoram sorkar a la inpeih lo a, inthlan buatsaihtu tur Mizoram State Election Commission (SEC) an inpeih tawh thung. LMC-ah hian ward XI-ah voters 40,541 an awm.

LMC inthlan hun tur chungchang chu SEC-in state sorkar a sawipui turin danah ziah a ni a; hei vang hian SEC chuan inthlan hun sawipuiah Mizoram sorkar a sáwm a, mahse, sorkar chuan an la inpeih loh thu October 6, 2022 khan SEC a hriattir a ni.

Vanglaini palai zawhna chhángin state election commissioner (SEC) Laima Chozah chuan, Mizoram sorkarin an la inpeih loh thu an hriattir hnuah inthlan hun sawipui turin an la sàwm leh loh thu a sawi a, "LMC office tur an la hawng lo a, an hawn hunah kan sáwm leh ang," a ti.

Laima Chozah sawi danin, Mizoram sorkar aṭangin inthlan buatsaihna tur sum SEC chuan a dawng tawh a; Mizoram sorkar inpeih veleha inthlan buatsaih thei turin an inpeih tawh a ni.

Danah chuan, LMC inthlan hi LMC din a ni tih hriattirna, notification a chhuah aṭanga kum khat chhungin buatsaih tur a ni a; hei vang hian inthlan buatsaihna turin March 2023 thleng hun a awm.

SEC chuan LMC inthlana hman turin electoral roll a buatsaih zo tawh a, final electoral roll pawh Oct. 14, 2022 khan tlangzarh a ni.

Vanglaini thu dawn danin, LMC pisa tur peih thawkhat a ni tawh a, hawn thuai tum a ni a; pisa atan hian Lunglei Convention Centre-a hmun ṭhenkhat hman tum a ni.