Sorkara thuràwn pe ṭhin turin CM Zorama'n doctor-te a sáwm

Indian Medical Association (IMA), Mizoram State Branch chuan nimin khan Aijal Club-ah Annual Conference vawi 45-na an hmang a; khuallian, chief minister Zoramthanga chuan, doctor-te chu thuràwn pe ṭhin turin a sáwm.

CM Zoramthanga chuan, doctor-te chu an nihna leh thiamna a hlut thu sawiin, "A ṭul angin sorkara thuràwn pe ṭhin ang che u. Natna leh inenkawl dan chungchanga mipui hnena inhrilhriatna in lo pek ṭhinte a fakawm hle a, chhun­zawm zel rawh u," a ti a, IMA member-te duhsakna a hlân.

Doctor hna chu hna ropui tak a nih thu sawiin Zoramthanga chuan, "Damna kawngah chuan kan lei pathian hmuh theihte in ni. Mizoram hi tisaah a damna tura mipui kan inthlamuanna chu doctor-te in ni," a ti.

Kumin hi IMA, Mizoram State Branch din champha kum 50-na a ni a, golden jubilee puala souvenir siam chu Chief Minister hian a tlangzarh.

IMA Annual Conference hi an president Dr John Zohmingthanga'n a kaihruai a, honorary secretary Dr Chawnglungmuana, finance secretary Dr R Lalduhawma leh auditor Dr Lalrinfela te hnen aṭangin report ngaihthlak a ni.