DC hminga sorkar lehkha lem siamtu PWD officer man a ni

Thlipui (Cyclone Sitrang) avangin October 25, 2022 (Thawh­lehni)-ah sorkar pisa zawng zawng chawlh tur thu puanna thupek, Aizawl DC hminga siamtu leh social media-a thehdarh ṭantua puh PWD superintending engineer Lalsangliana, ITI Veng, Aizawl chu man a ni.

Thlipui tleh avangin October 25, 2022 zingkarah sorkar lehkha lem, sorkar pisa zawng zawng chawlhna tur thupek, Aizawl DC hming ziah hnan anga siam (forged signature) chu WhatsApp-ah nasa taka thehdarh a ni. Sorkar thupek lem/phuahchawp avangin mi tam takin pisa chawlh a ni emaw tiin an buai phah hle niin Mizoram Police thuchhuah chuan a tarlang.

Lehkha lem siam leh thehdarh chungchangah hian Aizawl sub-divisional magistrate Isaac C Lalrempuia chuan October 25 vêk khan Cyber Crime Police Station-ah first information report (FIR) a thehlut a, Cyber Crime PS chuan IPC Section 468 leh 505(1)(b) hnuaiah thubuai an ziak lut nghal a, case no. chu 105/2022 a ni.

Police-te'n an chhui hnuah, lehkha lem (forged document) siamtu chu PWD SE Lalsangliana, ITI Veng a ni tih an hmu chhuak a, man nghal mah se, anticipatory bail a lak avangin chhuahtir leh nghal a ni.

Police thuchhuah chuan, sorkar lehkha pawimawh lem siam lo tur leh thawn darh lo turin mipui an ngen a, "Dan anga na taka inhrem theihna a nih avang leh mi ṭhenkhat pawh an lo chet chhiat fo tawhna a nih avangin hetiang thilah hian inhnamhnawih lo turin kan inngen tak meuh a ni," a ti.