Kan sorkar aṭanga ni 100 chhungin Mizoram hmél thlâk kan tum - Duhoma

ZPM leader Lal­duhoma chuan, ZPM party-in sorkarna an chan chuan CBI an koh luh dawn thu leh sorkar aṭanga ni 100 chhungin Mizoram hmélhmang thlâk an tum thu a sawi.

Lalduhoma hian nimin khan Hrangturzo biala Léng, Sailulâk leh Mualchéng khuate tlawhin, vantlang inkhawmah thu a sawi a; Mizoram ei chhetu ber chu eirûkna a nih thu sawiin, "Corruption hi thunun a ngai em em a, Pathian leh mipui zara kan sorkar chuan Lokayukta kan tichak ang a, chief minister thlenga chhui theiin kan siam dawn. India ramah state tlemtê CBI ko lut ngam lo an awm a, chu'ng zingah chuan Mizoram kan tel. Kan sorkar chuan CBI kan ko lut dawn a ni," a ti.

ZPM Leader chuan, "Kan sorkar aṭangin ni 100 chhungin kan ram hmélhmang thlâk kan tum a, mipui mimirte'n politician an thlir dan hi thlak danglam theih kan inbeisei," a ti a; MLA fund-te chu dik taka hman a nih chuan bial chhung tan hmasawnna tam tak thlen thei a nih thu leh eptu MLA ni chungin thil tam tak a thawh theih thu a sawi.

Lalduhoma chuan, MLA hlawh aṭangin in ṭha tak tak sak te, in hmun ṭha tak tak leite a theih loh tih sawiin, "Term khat MLA leh minister-te'n in ṭha leh ropui tak tak an sak hian mipui chan ái an ei a ni. Kan chan ái eiru duhte hian kan ram an ei chhia," a ti a; eiru ṭhinte chu vote lo turin mipui a chah.

Lalduhoma chuan, thlai thar lei an sawi ṭhin chungchangah, "Thlai thar zawng zawng kan lei thei dawn lo a, kan lei tur rate kan sawi lâwk dawn, a tam zawk erawh chu kan sorkar hnuah kan puang dawn," a ti a; crop insurance an hman dawn thu leh kawlphetha an ngaih pawimawh dawn thu a sawi bawk.