Grape wine mansakte licence tihfel hunah pek lêt a ni dawn

Excise & Narcotics department chuan thuchhuah siamin, The Mizoram Liquor Prohibition Rules, 2020 hmangin winery licence leh vendor licence-te tihfel a nih hunah grape wine an mansakte chu pek lêt theih a nih tur thu an tarlang.

END thuchhuah chuan, "MLP Rules peih hma leh dan anga wine vendor ruat hma leh tun hmaa licence neia siam ṭhin Champwine eng emaw zat Excise & Narcotics department-in a mansakte wine chu him taka vawn a ni," a ti.

Mizoram sorkarin MLP Rules 2020 a pawm hnuah winery licence dilna leh wine vendor dilnate chu dan hnuaiah thehluh mek a ni a, dilnate chu buaipui mek a nih thu tarlangin END chuan, "Licence leh thil ṭul dangte tihfel a nih hunah END-in Champwine a mansakte pawh dan ang thlapa pek chhuah leh theih a ni ang," a ti bawk.