Dan loa ramsa tawlhrûk mante Enkawl dan Governor sawipui

Youth for Environment Justice Mizoram (YEJM) hruaitute chuan nimin khan Raj Bhavan-ah Governor Hari Babu Kam­bhampati an kâwm a; ram dang aṭanga ramsa tawlh rûk mante enkawl dan a rang lama enfiah a pawimawh thu an hrilh.

YEJM hruaitute chuan, ram páwn lam chauha awm ramsa (exotic ani­mal) tam tak tun hnaiah Mizorama dan leh thupek kengkawhtute'n an man tawh thu an sawi a, "Páwn lam ramsate hi Asia chhimchhak ram ṭhenkhat aṭangin ramri kâna Mizorama rawn luhpui a, hmun danga la zawrh/ hralh tur ni-ah kan ngai," an ti.

Ram danga ramsate thuneitute'n an lo man chu ṭha an tih thu sawiin YEJM hruaitute chuan, "Ramsa an mante lo enkawl lailâwkna erawh duhthu a sâm lo tak zet," an ti a; ramsate chu báwm tê tak têah te, sahuanah leh a remchangah duhdah taka khung ṭhin an nih thu an sawi.

YEJM hruaitute sawi danin, ramsate chu chaw ṭha leh an mamawh angte pek a ni lo a; hri léng keng lut thei an nih avangin, Mizorama ran vulhte leh ramsate tan hri ṭha lo an pu lut thei a ni.

Tuna enkawlna pek an nih dan chu a him lo a, ramsa man khawmte enkawl lailâwkna (holding facility) tur Aizawl leh Champhaiah siam thuai a ṭulah an ngai bawk.

YEJM hruaitute chuan, a kaihhnawih sor­kar deptt. hotute sawipui turin Governor an ngen a ni.