MISSTA-in H/S zirtirtu leh LDC post ruakte hnawhkhah an duh

Mizoram Secondary School Teachers' Association (MISSTA) chuan nimin khan Chanmari YMA Hall, Aizawlah General Conference vawi 22-na an hmang a, high school zirtirtu leh lower division clerk (LDC) post ruak hnawhkhah a nih theih nan hmalak an rêl.

MISSTA inkhawm­puiah hian chawhnu lamah agenda lutte an ngaihtuah a; 'Govt. high school zirtirtu leh LDC post ruak hi sorkarin hnawhkhat rawh se,' tiin an rél a; 'H/S headmaster post ruak a hma thei ang bera hnawhkhat turin sorkarah thlen ni se,' an ti. District education officer (DEO)-a kai sang tura SDEO-te'n 75% leh H/S headmaster-te'n 25% an neih ṭhin chu a inzat (50% ve ve) a nih theih nan hmalak an rél bawk.

Inkhawmpuia khual­lian, School Education minister Lalchhandama Ralte chuan, zirtirtu hna chu hna zahawm a nih avangin an zahawmna vawng nung tur te, inpekna thar nen thawk tur te, hun vawng dik tur te, felfai taka inchei ṭhin tur te, sorkar hnathawk an ni tih hriaa conduct rules ngai pawimawh tur te, social media-ah an tih tur leh tih loh tur chin thliar thiam turtein zirtirtute a chah.

MISSTA General Conference-ah hian General Headquarters leh sub-headquarters hruaitute leh, Aizawla member-te an tel a; an member thi mi pariat an sûn bakah, an member pension mi 71 an thlah a ni.