19th HSS Games 2022 khàr a ni ; Infiamna hi subject dang ang bawka pawimawh a ni dawn - Education Minister

19th Higher Secondary School Games 2022 chu nimin khan zawh a ni a, a pumpuiah JL Higher Secondary School pakhatna an ni. School Education minister Lalchhandama Ralte chuan, NEP 2020 avangin infiamna chu subject dang ang bawka pawimawh a ni dawn tih a sawi.

HSS Games hi nimin khan Vanapa Hall-ah khàr a ni a, lawmmante sem a ni. A pumpuia champion JL HSS-in gold medal pali leh bronze medal pakhat an la a; best athlete-te chu hmeichhiaah gold medal pathum latu Elisian Meidaii, Baptist HSS leh mipaah gold medal pali latu Lalmuansanga JL HSS an ni.

Infiamna hrang hranga champion-te chu badminton (mipa)-ah St. Paul's HSS leh hmeichhiaah Mizo HSS, football (mipa)-ah C Zakhuma HSS, Kolasib leh volleyball (hmeichhia)-ah Khawzawl HSS-te an ni.

HSS Games khàrna inkhawma khuallian, School Education minister Lalchhandama Ralte chuan, National Education Policy 2020-in infiamna a ngaih pawimawh thu sawiin, "Zirna kára tlazep ni mai tawh loin, subject dang ang bawka pawimawh a ni ṭan dawn a, bul ṭan nan elementary school 40-ah grassroot level-a kalpui a ni dawn. District hrang hrangah sport zirna tur centre thlan a ni tawh a, kum tharah sikul tam zawkah huang zauh zel tum a ni," a ti.

Lalchhandama Ralte chuan, school games chu inunauna leh inṭhianṭhat nan leh ruihhlo ti lo tura rilru dik puttirtu atan zirlaite'n hmang se a duh thu sawiin, zirna tibahlah thei ruihhlo laka inthiar fihlim turin zirlaite a chah. Social media-ah thumal dik mang lo leh ṭawngkam chaltlai hman a tam thu sawiin, zirlaite chu fimkhur tur leh aia upa zahna lantir a, Mizo nun ze mawi lantir fo turin a fuih bawk.

HSS Games-ah hian Aizawla HSS 14 leh Aizawl pawna HSS 12, an vaiin sikul 26 an tel a; zirlai infiammi 811 telin, mipa 473 leh hmeichhia 338 an ni a, zirlaite kaihruaitu zirtirtu 109 an tel. Games khàrna inkhawm hi School Education secretary Dr Lalzirmawia Chhangte-in a kaihruai a ni.