Mizo pasalṭhate hnûhmá zirho a ni

Pachhunga University College-a Mizo department leh Social Welfare & Tribal Affairs department chuan nimin khan PUC Seminar Hall-ah 'Vai Len leh Mizote: Hman pasalṭhate hnuhma' Revisiting Lushai/Chin Expedition: Role of Mizo Freedom Fighters) tih zirhona an buatsaih a, minister Lalchamliana’n a hmanpui.

Minister hian PUC Mizo department-in Mizo ṭawng leh sap ṭawnga an buatsaih 'Mi pangate chanchin tawi - Mizo hnam pasalṭhate (A short biography of five Mizo freedom fighters) tih lehkhabu a tlangzarh a; khualzahawm L Thangmawia, MLA-in PUC Mizo department assistant professor Lalzuitluanga ziah, 'Mizo thufingte zir zauna - An analytical study of Mizo proverbs' tih lehkhabu a tlangzarh bawk.

Lalchamliana chuan, tunlaiah chuan ram leh hnam humhalh turin tharum thawh a rem lohna tam tak a awm tawh tih sawiin, "Kawng dang kan dap a ngai a, a pawimawh ber zinga pakhat chu mahni intodelh a, mi dang rinchhan loa kan din chhuah a ni," a ti a; mi thawh chhuah sa vek ringa khawsa lo a, mahni kutchhuak ringa intunnun theih nan theihtawp chhuah vek a ṭul thu a sawi.

Zalenna sual laia mi huaisente inpekna inhrilh thar fo a pawimawh thu sawiin Minister chuan, "Zalenna sualnaah a man kan pe tam em em a, vailen hre pha lo mah ila, rambuai kan hre pha a, nunna hlu tak tak kan chàn bakah, in leh lo kan chán a, mihring zahawmna nasa taka tihbawrhbàn a ni a, a tuartuteah ser nung lian tak tak hnutchhiah a ni ṭhin," a ti.

Zirhonaah hian Mizoram University Political Science department-a professor Jangkhongam Dougel-a'n thupui sawiin, vai len thawh khatna leh thawh hnihnain Zo hnahthlak hnam hrang hrangte a nghawng dan a sawifiah a; vawiinah chhunzawma zawh a ni ang.