Oil depot leh bottling plant sawiho

October 27, Ningani tlai khan chief minister Zoramthanga leh Indian Oil Corporation hotute'n Mizorama oil depot leh bottling plant siam chungchang Chief Minister's Office-ah an sawiho.

Sawihonaah hian rélin a châwm tur tuialhthei dahna hmunpui POL depot (rail fed oil depot) din chungchang sawiho a ni a; Sairanga lut tur rél kawng siam mek ringa Sihhmuia oil depot siam a nih theihna atana ruahmanna IOC-in an siam leh bawhzui ngaite thlirho a ni.

Mualkhanga gas bottling plant awm mek chu lian zawka siam tura IOC-in rawtna an siam leh chumiin a nghawng tur hrang hrang an tarlante sawiho a ni bawk.

Ṭhutkhawmah hian Mizoram sorkar aṭangin Food, Civil Supplies & Consumer Affairs minister K Lalrinliana, secretary Ramdinliani leh director Andrew H Vanlaldika te pawh an tel a ni.