Thla 9 chhungin Champhai & Khawzawl District-ah HIV+ve mi 165 hmu chhuak

Champhai District Organising Committee on Zoram Harh Rawh Campaign member-te pualin nimin khan HIV/AIDS chungchang inzirtirna leh hmalak dan tur sawihona buatsaih a ni a; Champhai district (Khawzawl district telin)-ah January-September, 2022 chhungin HIV vei mi 165 hmuh chhuah a nih thu tarlan a ni.

Sawihonaa tarlan danin, Champhai district-ah (Khawzawl district pian hma angin) kumin January aṭanga September thla thleng khan mi 6,689-te thisen endik aṭangin HIV vei mi 165 hmuh chhuah a ni a, HIV positive zat chu 2.47% a tling.

Champhai leh Khawzawl district-ah kumin January-September chhung khan mi náwlpui (general client)-ah mi 3,814 endik aṭangin HIV+ve mi 144 hmuh chhuah a ni a, chu chu 3.77% a tling. Nau pâi mi 2,875 endik aṭangin HIV+ve mi 21 hmuh a ni a, chu chu 0.73% a ni.

HIV veite'n an kai chhan tam ber chu mipat hmeichhiatna hman aṭangin a ni a, hriau thianghlim lo inhman ṭâwmin a dawt. HIV+ve hmuh chhuah tawh zinga mi 2,014 chu anti retroviral therapy (ART) centre-ah inziak lut tawhin, mi 1,197-in ART an la mek a; OST la mek Champhai district-ah mi 694 leh Khawzawl district-ah mi 453 an awm bawk.

Zoram Harh Rawh Campaign hi Central YMA leh Mizoram State AIDS Control Society (MSACS)-te'n HIV/AIDS hluar zel tur dona tura an kalpui a ni a; Campaign hnuaiah hian district hrang hrangah November 15-19, 2022 chhungin Mizo hnam làm, hnam hla leh hla inphuahsiak hmangin intihsiak buatsaih tum a ni. Intihsiaka telte tan HIV/AIDS chungchang inzirtirna kalpui a nih dawn bakah, a duh tan thisen endiktir theih a ni ang.