MP Rosang'n AIR hotu a kâwm

Lok Sabha MP C Lalrosanga chuan nimin khan Aizawla rawn zin All India Radio director general Vasudha Gupta, AIR (News) director general ni bawk a kâwm a, Mizoram leh hmarchhak biala AIR leh Doordarshan kalphung leh hmasawnna tur a sawipui.

C Lalrosanga hian Vasudha Gupta chu hmarchhak bial, a bikin Mizorama AIR leh DDK-a thawkte harsatna chinfel dan ngai pawimawh turin a ngen a, "Kaisanna mumal nei loa rei tak tak hna lo thawk tawhte an kaisanna tur kawng dap vat a ṭul," a ti. Thu leh hla puan chhuahna hmanrua leh khawl ṭha an mamawhte a sawipui bawk.

Vasudha Gupta chuan, kum 40 vel radio leh TV lama hna thawk tawh leh hotu ni tawh C Lalrosanga chu zau zawka thawhpui tur leh rawtnate thlen ṭhin turin a ngen a ni.