ZPM boruak hian kan khingpuite titím - ZPM Working President

ZPM party chuan nimin khan TOA Conference Hall, Lunglawnah Lunglei Municipal Council Area 9&10 Meet an hmang a, hmanpuitu K Sapdanga, ZPM working president chuan, municipal changtu minister-in LMC inthlan tur vawi hnih a puan hnuah leh draft roll peih hnuah pawh an la sawn hnung zel tih a sawi.

K Sapdanga chuan, ZPM Southern Headquarters chu an khingpuite'n an enthla nasa tih sawiin, "ZPM inthlang hi buai vak se, an buai lai takin LMC inthlang ang aw, an ti ni tur a ni. Kan han inthlang a, an rin loh lamah kan inhlâwm khawm a, nasa takin kan ṭhang. LMC hlimthla a lang niin an hria a ni ngei ang, a changtu minister-in vawi hnih a puan hnuah leh draft roll peih hnuah pawh an la sawn hnung zel a ni," a ti.

Chief Minister bial, Zemabawkah local council by-election nei turin sorkar a inpeih thei lo tih sawiin Sapdanga chuan, "Law court-ah kal tur nge, kan hotute'n an la ngaihtuah ang chu," a ti a; "ZPM hi eng tiat nge a nih kan khingpuite'n an hre chiang zel a, kan boruak hian kan khingpuite a titím zo a, chu chuan ram pum a nghawng mek a ni," tiin, MNF-in him tawha an inngaih hnua Keifang Venglai VC by-election-ah ZPM an chak thu a sawi.

ZPM Working President chuan, Lunglei khawpui chu phai lama lemchan nan sorkarin a hmang nasa nia sawi a awm thu sawiin, "Chhuanlam atana hman kan nihna a rei tawh viau tihna a ni. State leh municipal-ah ZPM a sorkar chuan hetiang lemchanna zawng zawng hi a takah chantir kan tum tur a ni," a ti.

K Sapdanga chuan, ZPM chu mipuiin an beisei dan a dang nia sawiin, "Kalphung danglam tak kan nei a, kalphung thar, mipui sorkar din kan tum miau a ni. Party naupang ber kan ni chungin campaign tam ber leh feh chhuak tam ber nih kan tum," a ti bawk.

ZPM Southern Headquarters president Lalrinpuii pawhin thu sawiin, "Pu Lalduhoma leh Pu Sapdanga inkawp hi a ṭhain a fuh em em a, ZPM pawh nasa takin a ṭhang zel a ni," a ti a; mi tin tana hmasawnna inrual tlang a awm theih nan taima taka thawk turin an party mite a chah.

Inkhawmah hian ZPM Working President-in an party zawm thar mi 112 a lawm lut niin ZPM thuchhuah chuan a tarlang.