KHAWTHLIR

Thisen pe
Hnahthial Peniel Branch YMA chuan an din champha pualin nimin khan an branch YMA hall-ah thisen pek an huaihawt a, Civil Hospital, Lunglei tan thisen unit 33 an pe a, petute mipa 31 leh hmeichhia pahnih an ni.

MNYF-in lawmpui
Mizo National Youth Front chuan October 27, Ningani zan khan IIT, Kharagpur aṭanga Computer Science & Engineering-a doctorate degree hmu thar F Lalchhandama s/o FC Lalrinawma, Siaha chu a chenna Mission Vengthlangah lawmpuina an hlan. Lawmpuina leh chawimawina atan MNYF president L Thangmawia'n thuchei leh pangpar a hlàn a ni.

Upate tlawhpui
Mamit khawpuia kum 65 chung lamte chu nimin khan Mamit khawpui leh a chhehvela sorkar hmalaknate tlawhpui an ni. Kum upate tana sorkar hmalakna tlawh tur hian bialtu MLA H Lalzirliana leh MNF, Mamit Center Block ten ruahmanna an siam a; mi 70 telin, District Sport Complex, Residential Sport School, District Hospital, Multipurpose Indoor Hall, Vety Hospital, CMO pisa leh ANM School-te tlawhpui an ni.

Lungpho HS jubilee
Lungpho High School chuan nimin khan an golden jubilee leh HSLC exam centre thar an nih lawmna hun an hmang a, bialtu MLA, Assembly deputy speaker Lalrinawma'n a hmanpui. Lalrinawma hian jubilee lungphun a hawng a, School Education director Dr H Lalthangliana'n souvenir a tlangzarh bawk.

Nungcha veh khap
Lunglei bawrhsap Kulothungan A chuan thupek chhuahin, Lunglei district-ah dan loa silai kawl te, silai leh sairawkherh hmanga nungcha veh leh kah/perhte khap a nih thu a tarlang. Thupek zâwm lote chu IPC Section 188 hmanga hrem theih an ni.

Workshop buatsaih
ADB , Project Planning, Development & Management Consultant, Mott MacDonald leh UDPA dept-te chuan nimin khan UDPA conference hall-ah Aizawl Sustainable Urban Transport Project Workshop an buatsaih a, thupui chu ‘Orientation (Operating Environment) for Strategic Procurement Plan’ tih a ni.