CBI koh luh chhan sorkarin sawifiah Ka intiam vanga koh luh an ni - CM

Law & Judicial department chuan thuchhuah siamin, Mizo Carbon Product Ltd.-in sorkar laipui aṭanga subsidy a dil chungchangah thil dik lo a awma hriat chungchang chhui turin Mizoram sorkarin Central Bureau of Investigation (CBI) chhuitir remtihna October 17, 2017-ah a tichhuak niin a tarlang. Chief minister Lal Thanhawla chuan, Mizo Carbon Product-in sorkar laipui aṭanga subsidy a hmuh dan chhui tura CBI koh luh a nih chhan chu CBI ko lut tura a intiam vang a nih thu a sawi.

Law & Judicial thuchhuah chuan, Mizo Carbon Product-in Trans­port subsidy a hmuh danah thil dik lo a awma hriat a nih vanga Vanramchhuangi’n Hight Court-a PIL a thehluh thu a kal zel laiin, Mizoram sorkara Vigilance department-in October 17, 2017-ah Notification No.C.31016/55/2016-VIG dt 17.10.2017 hmangin CBI chhui tura remtihna a pe niin a tarlang a ni.

Vigilance department-in Mizo Carbon Product chhui hna CBI pek remtihna a chhuah avangin October 31, 2017-ah Gauhati High Court, Aizawl Bench-ah sorkar ukil Biswajit Deb, advocate general-in High Court-ah Mizoram sorkarin CBI chhui tura remtihna (consent) notification a chhuah tawh thu a sawi tih sorkar thuchhuah chuan a tarlang.

Sorkar thuchhuah chuan, "Hei vang hian Hight Court chuan WP(C)(PIL) No. 55 of 2017 with WP (C) No. 50 of 2017 chu tihtawp a ni tiin order a siam a. High Court thutluknaah hian Mizoram sorkarin CBI chhui remtihna a lo siam tawh zawk avangin High Court chuan PIL a titawp a ni," a ti.

Nimina Congress Bhavan-a political session-a thu a sawinaah Lal Thanhawla chuan, "CBI koh luh a nihna tur chhan chu ka lo intiam tawh vang a ni. Mizoram sorkarin a phal loh chuan koh luh ngawt theih a ni lo," a ti.

Hawla chuan, "Mahse, ka hlauhthawn chu MNF hotupa berin CBI-te chu tham theih a nih thu a lo sawi tawh a, eng pawh chhui chhuak se an sawisel leh tho ang tih ka hlau," a ti.

MPCC President chuan, fûr a nat avangin kawng chhe lo se MNF-in sawi tur an neih loh tur thu sawiin, "Ruahsur nasa hi MNF tan chuan lawmawm tak a ni. Party lian ber inti hian Congress an hlau hle a, an pu ber hian Congress sawi loin thu a sawi tawp thei lo," a ti a; an party chu len belh zelin, Zoram dung leh vângah lawm luh tur an nei zel niin a sawi.

PC sorkar leh MNF sorkarah Mizoram pumpui tan hmasawnna siam a awm loh thu sawiin, "Tuirial HEP leh Referral Hospital-te kan hre tawh. Tuirial HEP hawn mai theih a ni tawh a, Referral Hospital pawh MNF an sorkar lai khan ar vulh nante an hmang mai mai a, tunah chuan kan hotute'n theihtawp chhuahin hma an la a, tlawhtu pawh an tam chho hle tawh a ni," a ti.