Nurse zir turte lawmna hun hmang

Mizoram College of Nursing (MCON) chuan nimin khan college hall, Falkawnah Graduation and Lamp Lighting Cere­mony an buatsaih a, minister KS Thanga'n a hmanpui.

KS Thanga chuan, nurse hna chu inpekna tak tak nena thawh chi, khawngaihna rawngbawl hna a nih thu a sawi a, "Nurse-te hi doctor-te aia damlote bula awm tam zawk leh enkawltu ber an nih avangin damlote tana Pathianin a aiawha a dah an ni. Hlim taka damlote bula awm a, thlamuantu nih a pawimawh," a ti.

Mizo nurse-te chu khaw­vel hmun dangah pawh kal se an duai lo a, thiam­na kawngah hnam dangte aiin an hniam lo tih sawiin KS Thanga chuan, "Hna hahthlak a nih avangin taimak leh tawrhchhel erawh a ngai," a ti a; rinawm leh taima taka thawk turin nurse zirlaite a fuih.

MCON hi Nursing School, Civil Hospital Aizawl tiin kum 1980-ah din a ni a, B.Sc. (Nursing) zirna hawn a nih hnuah a hming hi Mizoram College of Nursing tia thlak a ni. Kum tin first year zir thar tur mi 30 lak ṭhin a ni a; B.Sc. (Nursing) hi kum li zir niin, zirlai 120 awm reng ang an ni.