ZPM-in ṭanrualnain 'chance' an beisei

Ṭangrual pawl, Zoram Peoples’ Movement (ZPM) chuan nimin khan Treasury Square-a an pisaah chhung inkhawm an nei a; ZPM Steering Committee chairman Lalliansawta’n kaihruaiin, PL Liandinga’n thu a sawi a, "ZPM-te hi kan ṭanruala kan thâ a rual phawt chuan sorkar theihna chance kan nei," a ti.

PL Liandinga chuan, mi fel leh ṭha awm khawmin ram rorelna an chelh a, ram erawh chu a dam si lo tih sawiin, "Kan sorkar hrawn ṭhinte kalphung en hian a lungawithlak loh hle. Kum 20 kal taa kan chhuk en Tripura state chu tunah chuan kan chhoh thlir vawng vawng mai a ni," a ti a; Tripura hmasawnna chu Mizoramin a hmu pha meuh ta lo niin a sawi.

Mizoram dung leh vângah kawng­pui a chhiat vel vek avangin hma­sawnna a ṭhuanawp tih sawiin, PL Liandinga chuan, a bikin thingtlang mipuite rilru a pawt hniam phah hle niin a sawi a, "Hetianga kan kawng chhiat chhan chu kan ram rorelna system chhiat vang a ni. Hmasawnna hi mimalin emaw, khaw malin emaw pumbilh chi a ni lo," a ti.

PL Liandinga chuan, Mizorama education chhiain rah a chhuah tak tak hun a huphurhawm tih sawiin, "Sorkar sikul hi sorkar sum hmangin kan tichhe ngat ngat a, kawng chhia chu a siam-ṭhat theih, education erawh chu a hun laia siamṭhat a nih loh chuan engtikah mah pek let theih a ni lo," a ti a; doctor leh zirtirtu hna chu khawvelin an zah laiin, Mizoramah chuan zirtirtute chu hniam bera inngai tur khawpa enkawl an niin a sawi.

ZPM inkhawm kaihruaitu Lalliansawta chuan, ram veitu pastor rual leh mithiam rual pension tawh, nihna leh chanvo thlahlel lo, hlâwkna beisei lote'n ram an vei tih sawiin, chu'ng mite chuan ZPM an uap khawm avangin a thlamuanthlak hle tih a sawi a, "Tun hi Mizoram siamṭhat nan hun rangkachak a ni," a ti.